導演黃進首部執導、曾志偉、 余文樂、金燕玲、方皓玟等主演嘅電影《一念無明》，獲「香港電影製片家協會」董事局推薦，代表香港角逐入圍明年舉行「第 90屆奧斯卡金像獎」嘅最佳外語片獎。

今次製片家協會董事局成員由2016年10月份至2017年9月份期間上映之所有香港電影中挑選，從最後入圍之四部影片包括《追龍》、《擺渡人》、《七月與安生》及《一念無明》中，最後選出《一念無明》代表香港參加角逐。《一》片由香港商務及經濟發展局創意香港喺13年推出嘅「首部劇情電影計劃」嘅作品，同期獲資助拍攝嘅仲有陳志發導演嘅《點五步》。

《一》片導演黃進表示：「剛收到消息好開心，再一次想喺度多謝工作人員，參與嘅咁多位，仲要多謝幾位我敬佩嘅演員主演。另外好重要多謝觀眾，佢哋係最重要部份，好大運氣同祝福，同時間我哋唔會停落嚟，學習、檢討同創作緊，之後會有更加好作品帶畀大家。」

至於主演嘅余文樂，收到消息後即興奮表示：「嘩嘩嘩，完全冇諗過，冇諗過套戲有咁犀利角逐機會，多謝所有人，多謝，恭喜導演，希望套戲有好成績。」而方皓玟亦話：「恭喜《一念無明》團隊，希望大家繼續支持香港電影。」

金燕玲亦回應話：「呢個係第二次，《踏血尋梅》係第一次，今次更加開心，因為係200萬製作嘅香港電影，由兩位小朋友黃進同陳楚珩創作出嚟，更加開心，好鼓舞同榮幸。」