同根生，命運又係咪一樣？

同樣係由有線過檔無綫，不過，幾位男主播星途可以用到「差天共地」嚟形容，無他嘅，星運同因緣際會唔同，出到嚟效果咪又唔一樣囉。

洪永城
數勻咁多個過檔嘅有線主播，最高曝光率同名氣嘅，必數洪永城。佢喺無綫除咗繼續拍其旅遊節目，好似《走過烽火大地》、《在那遙遠的地方》系列，以及早排播完嘅《退休地圖》之外，洪永城仲參演唔少劇集演出，包括《單戀雙城》、《愛我請留言》等，其中喺《張保仔》、《味想天開》同《我瞞結婚了》中仲擔正演男一，計演藝發展，最好一定係佢！

陸浩明（6號）
一講6號，就諗到肥媽Maria Cordero，再聯想到嘅就係佢哋個《食平D》系列，長做長有，6號雖然做「下把」位，成日被肥媽鬧同打，不過，咁樣有咁樣吸引到fans捧場。而6號係醒目仔，高高大大，口才又了得，所以有啲大騷都會搵佢做主持，加啲其他濕濕碎碎嘅節目嘉賓，或者劇集客串，6號嘅曝光率同名氣，應該係僅次於洪永城。

區永權
已為人夫嘅區永權，形象正面，不時喺佢常規性地擔任主持嘅《東張西望》中提及家中妻兒，好男人形象穩固。有指佢為人較為圓滑，加上係余詠珊愛將之一，所以正式過檔無綫後，不乏曝光機會。不得不提佢之前喺主持《東張》期間，忍住盲腸炎都要做埋個節目先入醫院接受診治，呢啲肯「搵命博」嘅員工，應該唔係好多個。

衛志豪
喺有線做開主持嘅衛志豪，過檔無綫後都係繼續老本行，主持過《尋謎博物館》等綜藝節目，又擔任《娛樂3兄弟》、《一綫娛樂》同《煒哥的味道》主持，但係佢嘅曝光率，似乎唔及啲「同事」多，劇集有演嘅，比較近嘅就係喺《巨輪II》中扮年輕版高天鷲，同《幕後玩家》演Marco咁啦。至於其他演藝job，好難先搵到佢身影，之前有傳過因為佢成日扮大佬，所以啲幕後工作人員都麻麻哋佢，咁演出機會自然就……你懂的。

不過，墊底嘅應該係被揭偷食、形象盡毀、復出都俾人鬧嘅李潤庭……