少年食神林澄光人紅是非多，近日被指嗒拍檔高海寧及做生意有呃錢之嫌，昨他對傳聞一概否認，但慶幸獲朋友力撐，令他深信陽光總在風雨後。金句連綿不絕的少年食神自稱單身，更以「打的」妙喻愛情論：「你要時唔係通街見到有，偏偏上咗車就通街都係。」

少年食神林澄光（Michael）近日是非纏身，被指主持無綫飲食節目《為食一條街》食完高海寧周街唱，又指他做生意有搵笨之嫌。昨日林澄光接受本報記者電話訪問時，表示對傳聞莫名其妙：「我同高Ling（高海寧）係好拍檔，但工作以外甚少聯絡，話乜嘢食完通街唱，我摸不着頭腦晒頭。」

車牌冧梁敏儀

林澄光否認追求高海寧，又堅稱非如傳聞般以車牌冧梁敏儀及狂追其他女星，他說：「一班朋友出嚟，唔通當中有藝人就唔傾偈？唔係傾吓偈打個招呼就話追囉？」他強調與梁敏儀「完全冇瓜葛」，但承認曾借她靚車牌，事後要求歸還，他說：「自己儲好多車牌號碼，等如啲人儲手提電話號碼一樣，我話你個車牌麻麻哋，我有個牌就嚟到期，你拎去用吖，就係咁之嘛。我係有拎返，因為個牌屬於我，朋友嘅嘢有借有還。」梁敏儀會否以為被他追求？他說：「人哋點諗我唔知，我真係冇囉。」
聲稱沒有女朋友的林澄光緋聞熱炒，金句不遜黎明的他即以「打的」妙論說：「愛情喺我心目中同搭的士一樣，你要時唔係通街見到有，偏偏上咗車就通街都係。」
對於被指做生意呃錢，林澄光說：「做生意唔係賺就係蝕o架啦。」森美投資10萬予少年食神的灣仔食肆，林澄光謂早已將款項歸還森美，兩人更一如以往錄電台節目，他說：「做人唔可以為S兩戙唔開心，錢銀事小，千金易得，知己難求，唔會為區區十萬八萬唔開心。」EO2的Eddie指他得把口呃人，林澄光說：「我同佢唔熟，不過公道自在人心。」

高海寧要儲錢

忽然萬箭穿心，林澄光形容感覺奇妙：「唔開心一定有，但所有朋友嘅來電都好支持我，話陽光總在風雨後，呢句話畀好多支持我，令我喺呢個冬天感受人間溫暖。」此外，高海寧昨於都會商場出席活動時繼續否認被少年食神「速食」，又堅稱兩人私下沒聯絡，問她會否出錢讓林澄光投資？高海寧即稱要儲錢買車買樓，似乎要與少年食神劃清界線。
採訪：夏琴
攝影：譚倩宜