日本歌姬安室奈美惠巡迴演唱會，今晚喺台灣站上演最後一場，一如以往，安室在謝幕時感謝fans多年來嘅支持，其後佢喺自己facebook貼上與舞蹈人員嘅合照，更以英日兩語留言感謝到場睇騷的觀眾，佢下站就會喺東京開騷。

而噚晚慕名去捧場嘅台灣天后蔡依林（Jolin），特登送上佢拿手嘅翻糖蛋糕俾安室做紀念（新聞連結： https://bit.ly/2IX4Uwf ），今日Jolin喺fb貼出佢同安室及蛋糕嘅合照，並留言：「雖然外表看起來鎮定，但當本尊看到我的蛋糕，我還是害羞了起來（都一把年紀了還害羞，哈哈）」可見呢位Jolin有幾重視自己個作品。

Jolin亦喺fb公開自己做蛋糕嘅過程，原來個蛋糕係以安室喺大碟《PLAY》中嘅造型作藍本，但個蛋糕差少少就被放棄，送唔到去安室手上，幸好Jolin獲其做蛋糕團隊嘅同事幫手，令到蛋糕如期做成，不過Jolin話其實個蛋糕都係未及佢心目中嘅水準。其實最緊要都係心意，睇安室個笑容，就知佢都鍾意個蛋糕啦！

Jolin又喺fb留言話：「感謝安室的再次到來，很珍惜這份意外的友誼，每次每次都被她的笑容襲擊得很甘願，希望她永遠笑得燦爛，人生繼續精彩，我愛她。」

精選娛聞，喺晒《娛果》
http://fb.com/appledailyent