早兩日看了一套電影，是Ben Stiller主演的Brad’s Status（《人生剩利組》）。故事講述主角Brad踏入中年危機，不斷與身邊看似名成利就的舊同學作比較，並且對自己的地位及價值存疑。

其實做marketing呢一行，就算未踏入中年，有時都會質疑自己嘅價值。尤其是初入行頭幾年，OT時間長，平均時薪分分鐘追貼最低工資，所以相比其他同輩，有時難免產生自卑感。好似一大班新相識嘅朋友食飯，一句nice to meet you之後，各自介紹自己嘅職業，感受尤其深。

「Hi，我叫阿成，做海關。」我心裡暗想，如果係督察，起薪點都有4萬，唔......

「我係Mandy，喺中學度教書。」我心裡暗想，如果係GM，頂薪點有成6萬幾，唔......

聽完幾個人自介之後，唔知點解，我忽然無晒自信心。輪到我，我以柔弱嘅聲線講：「我叫William，我做媽劇停。」我心裡暗想，唔知佢哋會點諗我呢？然後我成餐飯都無點講過嘢。

有時深夜獨自睇Facebook，見到同輩po放閃照，心底裡總是有點不是味兒。「明明讀書時我成績好過佢，阿sir鍾意我多過佢，點解佢而家又搬大屋，仲可以曬house-warming嘅相？」然後心中有好多個問號，「究竟呢幾年我做錯咗邊一步，或者無做邊一步而導致呢個差別？」

呢啲想法係咪好無謂？其實係，但人有時難免比較，尤其是藏在你內心深處的感受。我相信無論是否marketer，好多人都曾經有過類似的暗黑情緒。有人比較完之後，自信心跌入谷低，不斷質疑自己是否一個loser，甚至走火入魔，不斷更新News Feed，睇下有無新post，然後繼續自怨自艾。要避免不自覺地跌入呢個循環，與別人比較後，就要想next step：是要努力尋找一份新工作，嘗試為自己叫一口更高的市場價；還是先裝備自己，為下一站做準備，或是於工作上更努力突出自己都可以。將比較後的挫敗感化成向上游的動力才至關重要。

經常說Facebook並不是一個只會帶給你娛樂的地方，所以《Brad’s Status》的導演說得對，「人總是喜歡透過社交媒體看別人的生活，然後以別人炫耀的那種生活作為標準。慢慢，當自己達成不了那理想生活，結果就陷入一種難過的情緒，覺得每個人都中了六合彩 —— 除了自己。」

你的情緒、你的目標，又是否被你每天的News Feed所牽引？


專欄作者簡介：
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁：
https://www.facebook.com/iDoMarketingHK/