現年53歲、80年代的「紅唇王子」蔡楓華（Ken）當年一句「一剎那光輝唔代表永恒」令星途盡毀，幸得有心人幫助，近年鹹魚翻生，前年在紅館開第一次演唱會，完成入行31年來的夢想。蔡楓華越做越心雄，早前在國際歌迷會上指為提高自己地位，已入紙申請年底再去紅館開騷，揚言要開足四面台。

比同類騷貴

可惜如意算盤打唔響，據悉今次申請紅館不成功，惟有轉場去荃灣大會堂繼續追夢；下月將開三場「情牽我心」演唱會，近日不少港鐵站內已有大型宣傳海報，Ken戴上招牌黑超襯黑色大褸，貫徹昔日造型。雖然場地及規模跟紅館無得比，但Ken依然開巨星價，票價最貴580元一張，比起其他同場騷貴一大截，連明年汪明荃跟香港中樂團合作的演唱會最貴票價亦只是400元，相對較便宜。昨日Ken被問是否收得貴？他在電話中笑笑口說：「全港個個咁上下啦！」銷情是否理想？他說：「唔知呀？總之我會盡力而為。」之後指自己「好忙、好忙」匆匆收線。
採訪：嵐山