月有圓缺，人有離合，都係無可奈何嘅事，好似華叔咁，畢生做事有條有理，身後事都一早交帶晒，卻不能親筆完成回憶錄，唔單止係佢嘅遺憾，亦係歷史嘅損失，不過人生總不能太完美，否則唔會成為傳奇。
政治人物回憶錄有價，因此外國政要落任後交權之時，隨即就着手處理出版回憶錄事宜，趁政治餘溫仍在撈一筆，也為自己功過定調，香港政治人物出版回憶錄者稀，一來冇乜嘢好回憶，二來冇份量，就算出回憶錄，相信冇乜人有興趣。

陳太同鄧蓮如堅拒

話雖如此，個別本地政治人物出版回憶錄都仍然好令人期待，華叔多年戰友馬丁肯定係其中一個。據八方所知，馬丁已答應港台拍攝回憶錄，口述從政幾十年見聞，披露殖民地年代至回歸後多次重大政治事件內情，有幾多料爆，八方拭目以待。
製作回憶錄呢回事，有華叔前車可鑑，真係唔使急，最緊要快，因此人大常委范太早前就接受港台訪問，製作范太政壇回憶錄，首集本來今個星期出街，但因為讓路予華叔特輯，所以要順延至月底推出。范太一度係港英寵兒，現時係北京重臣，佢嘅回憶錄值得期待。
據知范太至今無意出回憶錄，不過有人為佢寫過兩本傳記，分別係《香港政壇第一位女議長》及《悲歡都付笑談中》，前者在佢做立法會主席政治高峯時出版，後者總結從政心路歷程，港台拍嘅范太政壇回憶錄，內容應該不出呢兩本書。
香港政治人物回憶錄雖然唔算暢銷書，不過一直有市場，幾年前鍾士元、李鵬飛出版回憶錄係過渡期歷史重要資料，圈內人一直有游說退休高官出書，包括陳太同鄧蓮如，可惜兩人堅拒，原因之一係爆料必然涉及現時仍活躍政壇人物，出書後果難料。
民主黨主席何俊仁去年出版自傳《謙卑的奮鬥》，最有價值嘅應該係同北京談判，支持政改方案內容部份，梁耀忠去年出版嘅《我固執而持久地，過這種生活》，側面記錄香港工運、社運發展，比政客自吹自擂回憶錄有heart得多。

mailto:[email protected]