嚟緊立法會選舉，有唔少新興政黨、聯盟都係受佔領運動影響而部署參選，好似由6個傘後組織成立嘅選舉聯盟、領導層有前學民同學聯前骨幹組成嘅香港眾志等。唔少人則諗起，雨傘運動時「出雙入對」嘅學聯前秘書長周永康（Alex）同前副秘書長岑敖暉（Lester），會唔會孖咇出戰畀個驚喜粉絲呢？八方聽聞，Alexter呢對hehe檔真係有機會重出江湖喎！

婉拒加入香港眾志

有人喺香港眾志創黨禮見到Alexter，以為呢對傘運人氣王入黨，但佢哋異口同聲話no，Alex透露對方有叫佢入黨，但婉拒咗，因為自己只係想負責協調各傘後組織嘅工作，又話𠵱家有咁多個傘後組織，要作進一步整合，要等立法會選舉後嘞。Lester就話自己同眾志嘅起步點唔同，所以唔加入。
之但係江湖有傳聞，Lester打算出戰今年9月立法會嘅九龍西直選喎？Lester對此大方承認考慮緊；至於會唔會成立新組織？遲啲先講喎，但強調唔會以獨立人士身份參選，而選唔選呢，係要諗清楚香港嘅未來，唔想為選而選喎。
查實Alex之前講過計劃去美國升學，但政界有傳如果Lester真係去馬參選，Alex點會掉低佢？或者會排名單第二，幫戰友一把。如果傳言成真，hehe二人組有望「重出漿糊」殺遍年輕女選民喇！

李八方
mailto:[email protected]