港島甲級寫字樓租金向下，租客搵寫字樓大原則係租金開支細過以前。不過，屋之島物業顧問行董事總經理黃志強（Graham）話，佢哋今個月會「細屋搬大屋」，將總部由衡怡大廈搬去怡和大廈。租用面積由五千幾呎，擴大到近九千呎，多咗近八成，所以租金支出就比以前多啲。
Graham話搬大屋係要大事擴充，已經請多咗三十個大學生，準備加強甲級寫字樓租務代理，有意連上環同西環嘅優質乙級商廈租務都做埋，另外當然唔會放過佢哋強項之一嘅豪宅啦。現時屋之島有一百二十名員工。
聽Graham講，個新總部前後傾咗三至四個月。佢哋都幾信風水㗎，事前請過前老細孫漢明嘅老友嚟睇過風水。當然，地方大咗，重有全海景，梗正啦！做嘢醒神啲，自然風生水起。
中原911前夕搞party
今日係政府賣地兼「911事件」一周年前夕，所以發展商與代理行都唔想點搞發布會，但也有例外。新地上晝會宣布，小欖愛琴海岸新優惠；中原就專登揀今日早上，為其25周年連串慶祝活動搞開幕儀式。睇佢哋嘅安排，都係避免同賣地撞時間，若果唔係，想有記者去都幾難。
尖沙嘴食肆重撐得吓
近排頻頻見有食肆執笠嘅新聞，但其實新開業嘅都唔少，聽講最近尖沙嘴區就有5項租務個案，全部都係食肆。其中美麗華廣場地庫近萬九呎，就由一家日本餐廳以月租五十萬租咗，呎租約二十七蚊。
蘭西問康業物業李泳詩點睇尖沙嘴舖位市道，佢話因其他地區都有新商場落成，所以尖沙嘴區嘅零售市道近一年唔係咁活躍。但飲食業就重有支持，不過租金都要平啲至得。