【新增內容】

34歲孫慧雪早前被《蘋果》爆佢同富二代男友Edwin Lo入紙註冊，婚禮將喺今個月23號喺愉景灣行禮同擺酒，真係恭喜晒！(新聞連結： http://bit.ly/2gmsfbu )。

不過阿雪今次大有可能係雙喜臨門，事關早前《蘋果》收到報料，話有人目睹雪雪曾經喺養和醫院嘅體外受孕中心出現，係排期接受人工受孕，當時佢嘅準老公Edwin全程陪住，但係行出醫院嗰陣，佢哋兩個人嘅態度都好避忌，跟住好急步咁行上車。直到佢哋返到西灣河，戒心似乎放低咗好多，見到佢哋拖晒手咁邊行邊傾，恩愛程度爆晒燈！

今日仲有周刊爆雪雪疑似「有咗」，喺上周四由準老公Edwin陪佢去養和睇婦產科，成程有Edwin傍實，散出孕味，據知雪雪同Edwin喜歡小朋友，希望早日生B，暫時陀B未夠三個月先唔公開，周日佢又係著鬆身衫同Edwin出去食嘢，報道又指雪雪近日已同公司講，等佢完成手頭上嘅工作，就專心安胎，Edwin亦會管接管送。

因為根據現行香港法律，進行人工受孕必須有夫妻關係，正所謂有仔趁嫩生，加上阿雪年紀都唔細，越早成功造人，對媽媽嚟講，身體復原程度都會好好多。所以事情發生好順理利成章，阿雪做完人工受孕之後，再接受產檢，似乎真係要為阿雪送上祝福。

阿雪今日接受傳媒訪問，講到係咪造人成功？阿雪話：「其實係做婚前檢查啫，0依家籌備婚禮加上工作已經好忙好大壓力啦！請俾啲空間，多謝大家關心。」