今年香港網絡公關災難特別多，由梁烈唯MasterCard廣告掀剪卡潮、CY學玩facebook上載《喜歡你》踩界、葉劉專頁管理員EricChan事件等，花生由年頭食到年尾。

面對網民群情洶湧，大公司會選擇縮沙刪Post、講聲「對唔住囉」、或者視若無睹。不過今年有間奇葩初創公司香港室內沙灘(SandHouseHK)，將萬千網民負評變做一疊疊銀紙。

事緣年初有雜誌替室內沙灘創辦人做專訪，以《90後掟百萬工廈搞沙灘反應淡仲望回本》為題出街。報導於網上一石捲起千重浪，網民海量恥笑留言至今仍歷歷在目，諸如「大型狗廁」、「倒錢落錢」、「乜香港無沙灘咩？」、「執__咗佢喇」等。

不過網民負評如潮又如何，Peter橫睇掂睇都除笨有精。

皆因專訪出街後，往後至少有7份報紙、3份雜誌、3個網站及電視台先後報導Peter或者室內沙灘。驚人曝光下，大批香港人抱住獵奇心態前往，情形有如當日地獄料理西九明將成為網民集團自虐聖地而大收旺場。於是室內沙灘到4月已經收支平衡，暑假大收旺場，再加上與商場合作搞活動，年底Peter已經賺返百萬投資額。

對於娛樂相關產業來說，面子從來不重要，那管大眾好評抑或負皮，有noise就係好事，響咗朵先會有錢袋，天條是「There’snosuchthingasbadpublicityexceptyourownobituary.」

備受萬千網民恥笑的大台TVB更是當中表表者。整間公司由經營方針到旗下藝人都像個大型笑話。那管台慶劣抄兩年前奧斯卡派快餐、劇集穿崩爛尾成慣例、活在過去的陳百祥之流尤如跳樑小丑，但只要網民落力恥笑，大台就繼續賺個盆滿缽滿。

回顧大台過去多宗「監粗嚟」的植入式廣告，雞汁May姐無限輪迴「哈哈哈」、男主角用維他命水沙灘砌心型、台慶裡藝人食炸雞等，甚少打開電視的我通通不是在直播裡看到，而是發生後的三數天不停在facebookNewsFeed洗版。

我深信朋友分享柒人柒事主因是鄙視大台的弱智無知，但從結果而言，大台成功將廣告商品牌傳到大家的手機前，賺曝光兼袋廣告費。

所以有時看到某些反智的人和事，應該如我友人所言：「Stopmakingstupidpeoplefamous，有些人放屁係應該視若無睹，例如荷蘭叻及王晶。」

記者：陳東陽