韓國綜藝節目《Running Man》女星宋智孝近日相當忙碌，除咗要四出宣傳將於後日上映嘅新片《風風風》，更擔任新美妝節目《宋智孝的Beautiful Life》主持人，節目將於下周二首播。

智孝今日以一身粉紅色連身裙現身，率領另外三位主持人包括男諧星權赫秀、韓劇《月桂樹西裝店的紳士們》女星具在伊、女團MOMOLAND成員妍雨，出席《宋智孝的Beautiful Life》發佈會，雖然智孝不夠具在伊、妍雨晒腿示人搶鏡，但就顯得明艷照人。權赫秀表示今次係首次與智孝合作，大讚對方親切。而智孝今日心情就非常好，除咗不停賣萌外，更跟其他主持人有講有笑，智孝更一度笑到標眼水。

雖然粉絲都好期待智孝嘅新節目，但就有粉絲擔心節目會被具在伊拖累，事關具在伊於去年6月被爆酒後駕駛，之後就一直停工潛水冇蒲頭。而今日係具在伊捲酒駕後首次公開亮相，佢亦有喺現場就事件鞠躬道歉，不過仍有網民唔賣帳，惹來負評。

更多韓流，喺晒《娛果》
http://fb.com/appledailyent