近年香港大興土木，令不少工程公司得以發展亦吸引不少新血投身其中，但要令新血變得可承擔大任，便要經過不同建築項目的挑戰。80後的Arthur學業成績並非標青，但他憑着肯學肯做，令他得到接觸招牌拆建、住宅改建，及興建工廠、碼頭及搭橋等不同工程項目的機會，可以說是上山下海，其後憑着工作能力，令他在17年晉升為顧問工程有限公司的項目經理，可說是後生可畏。

採訪當日，早上9時，Arthur到西貢碼頭乘船出發前往橋咀洲工作，「嚟緊呢度會起一個公眾碼頭，承建商就搵咗我哋幫手，設計臨時工作台， 畀工人喺上面工作。另外，現進行試樁，測試支樁嘅承載力，我作為公司嘅代表，要睇番個測試方法合唔合乎準則，確保測試出嚟結果係正確嘅。」

今年29歲的Arthur，現在翱翔顧問工程有限公司擔任項目經理及工程師，他表示這崗位常要出外工作，「公司主要為建築項目提供設計及可行嘅建議、入則、監督地盤施工、建築完成後進行驗收等服務。我嘅工作包括見客接project、報價、畫圖、監察施工等，因為要實地勘察，所以出海攀山都唔少得。現在接觸嘅工程大細都有，包括招牌拆建、住宅改建、起工廠及碼頭等。」

不時要OT
Arthur在香港城市大學修讀建築及土木工程，11年畢業後，他加入工程公司擔任結構工程師助理，「我嘅讀書成績係全級墊底嗰堆，覺得畢到業就夠，但出到嚟工作會知道做得唔好，會影響同事、公司及自己嘅前途，所以我擺好多心機落去份工度，有乜唔明就問，唔怕辛苦。呢行不時要OT，趕project時連續1、2日唔返屋企，都好平常。」

結構工程主要是計算及設計建築工程的骨架，令其合乎安全及符合法例要求，Arthur肯學肯做，讓他得到機會接觸不同的工程，「要起一棟建築物，當中涉及好多項目，例如鋼嘅結構、混凝土、地基、上層建築、樑、柱、樓板及主力牆等，都需要計數。有啲公司會將項目拆分畀某一位同事負責，可能佢做咗幾年都只係計開混凝土及地基，但上司可能見我肯學肯捱，畀咗我去跟唔同嘅項目，每樣嘢都要翻書去學，但我會覺得學多樣嘢冇壞。雖然我未必夠專精一樣項目嘅人計得快，但對各項目都有認識。」

細公司更多機會
工作了5年多，Arthur的職位也沒有變動，他決定轉一轉工作環境，「公司要有人走先有得升職，我想出去試吓搵機會，覺得自己能力唔止咁，於是就裸辭休息一陣再搵工。咁啱有同學介紹咗現時嘅上司Vincent畀我識，話佢想埋班開顧問工程公司，我試吓去面試。當時知道成間公司加埋我只係得3個人，會有啲擔心，但呢個都係一個機遇，做得好會有更多機會，最後Vincent都錄取咗我。」

細公司沒人手，正好給機會讓Arthur驗證自己的能力，「好多嘢要一腳踢，慶幸自己之前乜都掂過，會易啲上手。第一單經手嘅項目係機場嘅周邊工程，係其他工程公司搵我哋幫手，最初係設計臨時工程嘅地基，可能見我哋完成得唔錯，陸續有項目搵我哋參與。之後要負責輸油管改道嘅工程，會經過沙洲，而島上本身有7條約十多米嘅橋只係畀工人行，我哋就要構思點去解決，最後決定重新起過7條橋，令到油管可以通過，上面又可以行到人，好有挑戰性。」

報價有學問
隨着公司發展的規模愈來愈大，而Arthur的工作能力亦得到肯定，在17年晉升為項目經理，「喺正常公司做十幾年都未必升到呢個位，因我算係公司嘅開荒牛，所以有呢個機會。之前只係跟job做，現在要識搵job做，最初都係Vincent帶住我同啲客傾，之後就到自己直接對客。當中報價好有學問，要識計用幾多人手、時間及風險，會驚令公司蝕錢，好有壓力。」

現時Arthur帶領着3名下屬，他表示將來希望可以接觸不同的建築項目，「最近接到單job，係幫個客起一個冷凍倉庫，由設計到搵承建商，都係由我哋一手包辦。雖然唔係話好大型嘅項目，但冷凍倉庫係我第一次接觸，做落先知自動噴灑系統唔可以用水，驚結冰，要用化學泡沫。工程嘅範疇好大，會經常學到新嘢，每個新項目對我嚟講都係一個新挑戰。自己應付考試嘅能力麻麻，現時個特許試都未通過，最近又去報考咗，希望今次可以成功。」

後記︰ 增廣見聞
Arthur表示平時工作沉悶，較為有趣是因工作關係，時常去到不是太多人去到的地方，「去過機場禁區，可以近距離睇到飛機升降。試過凌晨喺封咗嘅隧道內行，之後落到隊道下嘅通道做工程，都增加咗唔少見聞。」雖然記者的薪金不高，但是工作會接觸不同的人及工種，這些增加的見聞，也算是另一筆財富。

搵好工，即上 http://www.ecjobs.com.hk