當年今日
關於我們

蘋果批:我份AIA保單會點?(一) - 李兆富

蘋果日報 2008/09/17 00:00


呢兩日,一般市民終於亦感受到由美國樓市泡沫所觸發「金融海嘯」所帶來嘅恐慌,因為連全球最大保險公司都可能隨時會執笠嘅時候,大家開始知道今次海嘯好可能比上次97金融風暴有過之而無不及……撰文:李兆富、楊卓華、孫柏文

1

雷曼兄弟破產、AIA母公司AIG危危乎,雖然好多市民對今次「金融海嘯」背後嘅錯綜複雜仍然唔係太了解,但相信大家喺辦公室之內,已留意到同事議論紛紛:「兩兄弟有間公司,唔知點樣,輸咗AIA啲(AIG)錢……」為咗安定大家嘅情緒,呢兩日AIA透過經紀發出短訊,強調母公司AIG只係面對緊短期資金壓力,並唔影響香港呢邊AIA嘅運作。
財經專欄作者孫柏文:
AIG同AIA嘅關係,就好似滙控同恒生,賬目應該獨立處理。不過,紐約州政府已經批准咗,AIG可以向旗下(紐約州)子公司班200億美金救亡,𠵱家亦冇人知究竟AIA有冇份去「分擔」呢次危機。
獅子山學會創辦人李兆富:
其實就好似三鹿奶粉醜聞,唔好以為淨係奶粉有事,用呢啲奶粉開嘅奶茶咖啡一樣有毒。AIG真係出事嘅話,牽連可以係任何一間持有AIG產品嘅公司,換句話說,又點只AIA咁簡單?

4

事實上,對於今次金融海嘯嘅源頭──資產扺押結構產品──大家依然所知唔多,但都感覺得到風暴開始燒到埋身,皆因見到去年中次按風暴以嚟,摺埋嘅金融機構一間大過一間,今次仲燒到連傳統上被認為最穩陣嘅保險集團,大家都不禁要問:如果AIG出事,我嗰份AIA保單會點?
李兆富:
打個比喻,早幾年,啲金融機構風光嘅時候,其實就好似玩緊「積木層層叠」,大家將啲積木響個底度抽出嚟,叠上頂。但係終有一日,個底冇積木畀你抽出嚟,叠上頂亦冇位畀你放,結果就係今次火燒連環船式嘅金融危機。
一方面,好多公司嘅資產價值原來唔係咁高,甚至根本不值一文;另一方面,大家又要賣資產去還債,令到資產價值更加受壓,可以話係「金融人踩人事件」。
AIA係香港嘅龍頭保險公司,以市場佔有率計全港第一,保險客戶估計數以十萬計,香港人又習慣買儲蓄成份極重嘅保險,如果AIG最終真係破產,事件嘅震撼,可以講同銀行出事不遑多讓;問題係面對呢個危機,目前似乎冇人可以做到任何嘢……

明天再續:我份AIA保單會點?(二)