身為經濟學人，仲做過消費者委員會主席，未必就係英明嘅消費者。消委會成日叫人小心格價，唔好貪平。點知嶺南大學校長陳坤耀就明知故犯，十幾二十年前去新加坡誤買貴錶。
香港好多愛錶之人，包括玩錶二十年嘅陳坤耀。佢最鍾情嘅錶係德國名牌GlashutteOriginal同埋A.Lange&Sohne，鍾意佢哋手工精密、打磨細緻。至於令佢最唔高興嘅，就係一隻萬年曆錶。
八十年代尾，陳坤耀經常去星洲開會，有時會趁會議之間嘅空檔，抽兩、三粒鐘四圍觀光購物，有次就買咗一隻萬年曆錶。陳坤耀喺香港見過呢隻錶，隱約記得賣十萬蚊，新加坡只賣七萬，平成三萬銀，於是就買咗，點知返到香港，先知原來隻錶只值六萬幾，買貴咗成皮嘢。

記錯售價又唔識問人

陳坤耀憶述當年買貴錶嘅邏輯思路話：香港同新加坡都係高度競爭嘅城市，用價格平衡理論（EqualizationofPrices）嚟設想，兩地嘅貨品，尤其係呢類國際性產品，價錢唔應該相差太遠，覺得抵買。佢認為呢次經驗畀到佢一個教訓，就係經濟理論放喺日常生活，唔一定成立。
八方當然唔質疑陳坤耀嘅經濟學問，但係好明顯，佢買貴貨嘅主要原因，根本唔係經濟理論實唔實用嘅問題，而係佢記錯咗隻萬年曆錶喺香港嘅售價，如果佢打電話返香港託朋友問清楚，就唔使買貴錶。如果佢當年認為經濟理論用得着，都應該質疑，點解新加坡可以賣平咁多？係唔係賣老翻？

投訴酒樓貴不獲受理

陳坤耀任消委會主席期間，自己都有幫襯過消委會。話說約莫十年前，陳坤耀想喺酒樓擺酒請客，點咗佢至愛嘅油泡泥鯭球、老虎斑，再加幾味小菜，開價要成九千蚊一圍。
陳主席覺得呢間酒樓收費太離譜，向消委會投訴；但職員冇有識死，竟然唔受理，原因係投訴人陳坤耀食都未食，唔能夠單憑菜單投訴，陳坤耀覺得職員答得有趣，完全接受。

傳真︰2623-9278
電郵︰[email protected]