男神古天樂（古仔）日前為代言嘅月餅，同兩個小男孩拍檔拍廣告，雖然古仔同小朋友合作無數，之前拍電影《五個小孩的校長》時，仲同五個小女孩打成一遍，不過，出名「冧」細路有一手嘅佢，今次拍廣告時，竟然俾呢兩個小男孩考起。

事緣拍攝廣告當日，古仔要教小朋友講「黑芝麻，嘩嘩」、「白芝麻、嘩嘩」，但兩位小男孩好鬼馬，唔肯「開金口」同古仔講對白，無論古仔點o氹佢哋，小男孩都請古仔「食檸檬」，其中一個仲喊住搵媽咪抱抱，令見慣大場面嘅古仔都好鬼無奈。

不過「冧」小朋友有一手嘅古仔，耐性無限，更使出撒手鐧，喺袋中拎咗粒糖出嚟，成功「收服」佢哋，廣告最後順利完成，男神果然係男神。