有時人有相似真係會出現好多尷尬事，噚日周志文喺Instagram貼咗一條片，見到翟威廉俾兩位茶餐廳阿姐圍住，翟威廉個樣勁無奈話﹕「係啦，袁文傑自己都咁講呀！」鏡頭一轉就去咗兩位阿姐度，笑住指向翟威廉話﹕「都話似啦，真係似，做乜你兩個人咁似嘅？」

原來翟威廉俾人認錯係近日人氣急升嘅「游生」袁文傑，周志文留言：「今次《城市驚喜》嘅男主角就係近排俾人話似袁文傑嘅宅威廉，喺餐廳中俾人發現 仲一度被人追問點解你上鏡高咁多，一臉尷尬嘅威廉都好誠實咁同大家講，佢只有1米86。最後姐姐都送上例湯一碗紀念今日認錯人事件。」

翟威廉今日回覆傳媒時話件事都幾好笑，自己都唔係第一次俾人認錯，佢話：「除咗袁大哥(袁文傑)，最多人認錯我係長腳蟹(呂慧儀)老公黃文迪，好多人問我﹕『你老婆幾好嗎？』我話﹕『哦，係咪長腳蟹呀！』但都唔介意，全部都係friend，真人望就會分到，咁講番名都會認得我嘅。」

問到最想似邊個？翟威廉話﹕「我梗係想似袁大哥咁高大，如果我都有6尺2咁高(新聞連結： http://bit.ly/2sxmZIs )，我隊hero籃球隊就可以放心喇。」而目擊嘅周志文就話兩人都咁靚仔：「笑容好似，五官靚，但真人唔笑，其實都好易分到。」