今日喺尖東舉行IFPI香港唱片銷量大獎2016，英皇成為大贏家，大獎全掃，不過坤哥吳業坤都唔弱，一共拎咗四個獎，「十大銷量本地歌手」、「十大銷量廣東唱片，當中「「十大數碼暢銷歌曲」，坤哥嘅《原來她不夠愛我》及《陽光點的歌》同時獲獎。

坤哥話o依家喺深圳拍緊劇，今日專登返嚟香港，講到佢有四個獎，佢即好大反應問：「吓!講真o架!」咁係唔係買獎?佢就話：「唔係!其實出碟嗰陣，自己真係買咗3百隻，不過就真係好驚喜，真係冇諗過有人會幫襯，今次真係俾到力量我。」

坤哥今年主力拍劇多，反而出歌好少，9月底、10月頭就出新歌，佢受訪時更一路滴汗，要用紙巾抹，再問佢係咪減肥瘦咗?坤哥直言：「係呀!都瘦咗，我要轉型，想做偶像派。」被問係唔係「嘔像派」，坤哥就話係偶像嗰個偶，自言做咗實力派太耐，又話自己本身靚仔。

講到之前有個女藝人陳潔玲稱被人鹹濕，喺圈中遇到賤男，成日扮受情傷，又話自己對愛情專一去博人同情，出招追女，喺揞名爆料後，點知外界矛頭直指坤哥，問坤哥算唔算躺着都中槍，佢話：「係囉!森美之前喺節目都有幫我澄清番，唔係我，我好開心，仲播我啲歌。」咁會唔會爆嗰個男藝人係邊個?坤哥坦言：「唔會!加上我又唔知，唔想多一個受害者，不過自己都要檢討下，點解千萬個男藝人，大家會話我呢?」