當年今日
關於我們

【9月囡囡滿一歲】郭富城新戲留鬚兼減磅 餓住拍支持新導演

蘋果日報 2018/08/18 20:23

郭富城余香凝

郭富城今日就去到圓方,為夏日國際電影節擔任電影大使,余香凝就擔任青年大使,城城今日留咗鬚,佢就話係為咗電影《陌路人》而留,仲話接呢部電影係為咗支持新嘅導演,同埋唔會拍好耐,今個月就會拍晒。
城城又話依家接拍香港電影會多咗一份喜悅,因為可以多啲時間陪囡囡。城城又話今次呢個角色比較沉重,所以無論喺片長同埋屋企,都成日被問諗緊咩。城城除咗留鬚之外,仲瘦咗,佢就話因為個角色係演一個香港搵食好難嘅人,所以減磅係好基本,拍戲嗰時仲要係唔食嘢餓住拍,到收工先會食嘢。
講到今次夏日國際電影節嘅開幕電影《未來的未來》,城城就推介大家睇,佢仲講個故事:「係一個基本家庭有個女仔,知道之後會有個妹妹,開始有妒忌心,然後未來嘅自己出現,同個女仔去咗探險。」講完之後,城城就微微笑下,呢個笑容會唔會係同「妹妹」有關呢?會唔會係城城好快又做爸爸呢?囡囡9月就一歲生日,城城就話嗰日好重要,所以已經攞咗假,問到囡囡識叫爸爸未?城城即刻扁咀話:「未啊。」
城城又指最近有人開咗一個同佢IG名好似嘅用戶,話有佢嘅演唱會飛賣,城城叫大家記得要小心受騙。
余香凝就話未試過咁近距離見到城城,仲話想同城城拍啲警察、查案嘅戲,自己仲想演啲變態嘅凶手。
精選娛聞,喺晒《娛果》
http://fb.com/appledailyent