當年今日
關於我們

開波籌款 - 左丁山

蘋果日報 2007/11/19 00:00


傷健策騎協會(RidingfortheDisabled)舉行一年一度嘅籌款晚會(AnnualBall),十一月十六日在港麗酒店舉行,為RDA籌募經費及○八年傷殘奧運馬術賽經費,出席者有四百幾人。今年嘅衣飾係「黑與金」,男士晚禮服梗係全部黑色啦,冇乜好揀,女士晚禮服就多姿彩咯,黑金配搭甚多變化,香港女士不分中外,確多心思,而呢晚嘅華洋賓客比例幾勻巡吓,可以顯示香港係國際化城市。
晚會司儀由余文詩(Wendy)與馬主H擔任,余文詩穿紅色帶金嘅旗袍,配黑色披肩,艷光照人,馬主H就着BlancdeChine嘅黑色晚禮服,與余文詩相襯。余文詩雖然冇做電視好耐,幾乎日日去咗學騎馬,仍然俾人認得,馬主M太太等人就話到明係佢粉絲,與Wendy唔知幾好傾。
既然係籌款,梗係要有啲招數啦。招數一係世界體壇名人紀念品競投,物品有球王比利簽名之巴西球衣,朗尼簽名球鞋,曼聯07年冠軍球衣附全體球員簽名,阿仙奴球衣附全體球員簽名,費達拿簽名網球,英格蘭世界盃欖球隊球衣,英格蘭板球隊簽名球板,米高舒密加手套及照片,阿里與傅利沙拳套等等一共十七項,平時難得一見;(二)公開拍賣,有六件精品,趙世曾、黃坤、利子厚、施羅夫等與幾位大馬主喊價,競投激烈,(三)名人唱歌,底價每首歌兩萬元,著名歌星聶安達(AndersNelson)唱完一首之後都話要有兩萬元贊助先至可以唱第二支。
伴奏樂隊不是別人,就係國泰航空嘅TheYoungOnce,由陳南祿率領,先表演三十分鐘,由航空服務董事Quincy(莊偉茵)打頭陣,居然唱埋泰文版,技驚四座。因樂隊節拍強勁,RDA會長陳祖澤,主席楊國琦,晚會籌委會主席施費葆奇與夫婿施雅治等人紛紛走入舞池,大跳查查。陳南祿話邊位國泰航機乘客如對航班服務有不滿之處,可向最高負責人Quincy投訴喎。原來Quincy唱歌咁好聽,笑容咁燦爛,投訴人見到佢就軟化晒啦。