小小超李澤楷收購《信報》呢單消息，流傳大半個月後，噚日終於由曹仁超證實。曹仁超真名曹志明，係《信報》董事及股東，手上有五個巴仙股權，夠晒權威。
喺上個月二十號，有報紙話小小超洽購《信報》，當日《信報》內部出咗個通知，大意有兩點，第一點係話未收過PCCW或者now入股或收購要求；第二點就話林行止夫婦近兩三年冇見過李澤楷。咁嘅回應，表面上似否認，實際就迴避咗個問題，明眼人一睇就知有景轟。PCCW嘅當時官方答案重明顯，佢哋話「冇乜嘢可以補充」，咁即是係真有其事啦。
八方聽聞，消息傳出當日，咁啱《信報》開例會，林太都有返報館，但有位勤力嘅《明報》記者，喺門口等佢回應賣盤傳聞，結果林太避而不見，走後樓梯鬆人。如果真係冇人洽購或者唔會賣，出嚟講一聲就得啦；都係曹仁超夠坦白。

林生林太意興闌珊

《信報》一直係一份銷量小影響力大嘅報紙，北京領導人都好重視佢哋嘅言論，朱鎔基重話日日睇㖭。奈何九七之後，中立言論唔啱聽，唔聽話嘅傳媒更加冇運行。林生林太有啲意興闌珊，不時有賣盤消息傳出。23條時，林生更明言如果法案通過就可能關門唔撈咁話。但係《信報》個招牌咁值錢，有好多人想要，聽聞大班、飛哥、周小姐都有過興趣。
咁因乜事賣唔成呢？一來林生林太對張報紙感情好深，二來價錢好難傾。曹仁超話單交易涉及二億至二億五，呢個數話大唔大話細唔細，小小超雖然大把水，一樣好精打細算。
八方老友話，小小超今次唔用PCCW及now名義出手，而係組一個私人財團收購。但呢個財團，老闆實際得一個；至於話內有傳媒中人，咁何國輝算唔算傳媒人？
除咗價錢，另一個「阻礙」係法例。電視台老闆唔可以同時辦報，除非得行會批准。八方噚日搵過廣管局主席馮華健，佢話剛剛同局方傾過電話，佢哋會有嘢講。咁八方問局方，答案係咪收到電盈方面嘅申請，而條例唔止規管持牌人，亦管埋大股東。咁就即係要申請喇。
《信報》賣唔賣得成相信好快就知，傳媒中人以及《信報》中人都好關心。賣，擔心佢唔知變成點；唔賣，陰乾又唔係辦法。九七後媒體困局，大家由此可見。最後講多句，非常感謝各位讀者支持。


爆料熱線：29290000、27860099
報料傳真：26239278
報料電郵：[email protected]