9歲小巨肺Celine喺《全美一叮》一唱爆紅，連帶爸爸譚順生都多咗人識。之但係關於譚順生嘅新聞，好多都唔係咁正面，日前薛家燕就指譚順生「道義上有啲問題。」，之後譚順生再被揭歌唱獎項同本身首歌面世嘅年份有出入，呢啲佢喺今日嘅新碟發佈會上全部都有解釋。（新聞連結： http://bit.ly/2tIO4H2 ）

另一個談論重點，係譚順生嘅學歷問題，譚順生喺新碟發佈會解釋係咁：「我嘅學歷証明，其實的而且確我2008年係博士畢業，我喺呢間菲律賓馬尼拉University of Science and Technology畢業，就有呢張証書。」佢仲話，經過兩年辛苦嘅學習，先可以喺菲律賓馬尼拉University of Science and Technology畢業。

但《蘋果》發現，譚順生於2008年經國力書院報讀相關課程，並於同年畢業，較同期畢業同學提前一至兩年。而呢間國力書院，正正於早前被揭於香港代辦菲律賓比立勤國立大學及太歷國立大學之海外課程，涉嫌為部分申請人偽造文書，將入學日推前，以取得該等菲律賓大學的學士、碩士及博士學位，藝人蔡思貝及民建聯區議員鄭琴淵等人亦被揭發為國力書院的學生。消息人士指，譚極可能與其他涉及國力書院的人士一樣，涉偽造文書，推前入學日期（Backdate）。（新聞連結： http://bit.ly/2u37K7R ）

對於學歷再受質疑，譚順生公司宣傳部回應話：「今日要回應嘅嘢已經回應晒，唔再就呢件事回應。」至於譚順生公司老闆蕭定一亦話有關譚順生私生活嘢唔作回應。