之前大家成日話cut極都cut唔到有線（1097），估唔到九倉（004）就cut得好快，佢上周四先話同有線分手，由新世界發展（017）主席鄭家純為首嘅永升（亞洲）入主，呢個星期，有線同九倉就中環會德豐大廈3樓寫字樓的租約就到期，有線呢個中環直播室今日就last day了。

估計市價月租40萬

有線主要有3個主場，包括荃灣有線電視大樓、交易所直播室同會德豐大廈3樓，後者租用半層約5,000平方呎，按市價估計月租40萬元左右。呢度主要作為新聞台其中一個辦公室，由於位處中環核心，所以好多財經節目都喺呢到拍攝錄影，例如《Money Cafe》、《財經即時睇》等等，方便喺中環返工嘅嘉賓上去做節目。
「青姐」胡孟青對呢度特別有感情，佢形容自己係《Money Cafe》開山鼻租，約由2006年做到2011年，知道租約期滿，噚日專登打扮靚靚，帶埋阿仔返去影相留念。
查實九倉cut有線呢單刁未完成，有線最快5月底開股東特別大會，要小股東投票通過單刁，起碼要過到呢關先。有線員工暫時搬去荃灣返工，至於嘉賓係咪要山長水遠入荃灣呢？就未知。或者叫純官喺中環新世界大廈租個寫字樓畀有線喇。

李華華
mailto:[email protected]