阿Paul黃貫中同葉世榮噚晚出席紀念家駒慈善演唱會綵排，被問到嚟緊父親節會點慶祝？阿Paul講笑話：「乜呢個世界上有父親節㗎咩？唔係淨係得母親節咋咩？」聽佢咁講好似酸溜溜咁喎？佢繼續話：「唔止酸，係澀！不過個囡都會畫卡俾我嘅，見到都會感動嘅。」又話囡囡成日將啲畫作周圍貼，世榮都話自己個囡都成日周圍貼嘢，不過係貼貼紙，仲會貼上佢個身到o添！

世榮好大頭蝦以為上星期日(6月5日)就係父親節，仲打咗個電話同岳父講父親節快樂，點知原來兩個都搞錯咗，不過正日都會同囡囡過嘅，因為慈善演唱會之後第二日都會飛返上北京，仲話太太今次專程嚟香港睇呢個show去支持自己。

另外，8歲小妹妹Celine都有到場，世榮就話其實今日係代GiGi(梁詠琪)同佢練歌，因為Celine同GiGi到時係會合唱《真的愛你》。