「馬神」馬德鐘同名模老婆張筱蘭嘅囝囝馬在驤，早前去咗悉尼讀大學，兩公婆唔使湊仔，輕輕鬆鬆過番二人世界，佢哋不時拍拖出埠旅行。

今次馬神就同馬太孖咇飛咗去西藏玩，今日就見到馬太喺社交網貼咗好多喺西藏影嘅靚相，睇見佢哋四出觀光之餘，更見到馬神亦披上充滿特民俗風嘅頸巾，非常有型。

不過玩還玩，去到西藏好多人都有機會有高山反應，就算佢兩公婆事前做足準備亦唔例外，馬太留言：「西藏之旅，第一站拉薩，就是去體悟生命的本相。高山症的出現，給我們修行的第一課，即使準備功夫如何做足，無常也會隨時出現。我們必須積極面對各種不可預知的事情，珍惜無常帶來的啓示與教導。活着就是經歷、經歷就是體驗，體驗就是修行，讓我們進入清涼世界、自在人生。」

馬神孭飛嘅大台新劇《跳躍生命線》將於下周推出，劇中扮演救護總隊目嘅佢，仲會跟救護車出動到案發現場，為傷者做急救。馬神話拍劇學咗好多急救常識，唔知有冇派用場？

精選娛聞，喺晒《娛果》
http://fb.com/appledailyent