當年今日
關於我們

股壇瀏覽器:樓蟹鬆縛 寄望新特首

蘋果日報 2003/06/24 00:00


香港周一解除疫區之名,芬佬朋友忙於趁好消息出貨,趕住收工夜蒲蘭桂坊,除咗憧憬財爺happyhour請飲免費啤酒外,重希望突然被兩三個鬼妹熱烈擁吻一番。芬佬趕住收工,港股全日受壓,恒指大跌196點,收報9734點,成交83.78億元。芬佬朋友有冇收穫阿虎唔知,但阿虎噚晚則食咗幾擔白果,唔止香吻欠奉,啤酒要自己找數外,重俾個肥婆踩咗一腳,真係黑仔。論風流快活,阿虎點都及唔上財爺。

高寶停牌兩個版本
高寶綠色(274)晨早停牌,話要公布股價敏感消息。市場隨即傳出,有主要股東好似要配股減持。但黑客就話冇料到,今次停牌可能只係澄清公司獲國內稅務優惠情況。據聞,高寶於國內被評為廣東省高新科技企業,由獲利年度起計,可獲三免三減稅務優惠,即頭三年免稅,後三年減半徵稅。由於市場傳出是項優惠可令高寶節省集團總支出56%,所以要停牌作出澄清,應該係好事唔係壞事。
生命科技(1180)噚日逆市上升6.6%,收0.112元。有傳聞話生命科技在國內之威佳治療肝炎及治肝癌產品銷售理想,管理層噚日下午會見分析員吹水,唔知係咪開車先兆呢?
最近,房屋局孫公頻頻出鏡話會考慮一切可能穩定樓市的措施,反映政府面對樓市持續下滑,亦好心急搵辦法。若要推高樓價,只要政府肯承諾十年內唔批出住宅地皮,以及加快舊區重建(當然同時要強制高齡樓宇驗樓及維修),咁樣樓市肯定會重拾升軌,但只可惜阿董任期只餘4年,根本冇人可以做到呢個承諾。因此,里昂話香港要衰足十年,阿虎真係深信不疑,所以各位樓蟹只能寄望下一任特首。
阿虎