網絡通訊:網絡電話免費任傾
1線拖5機兄妹唔使爭
其實網絡電話一直都Hit緊,特點係打長途唔使錢之餘,話音仲好清晰、冇Delay,質素媲美用固網電話打IDD嗰隻!但若然成晚都黐實部電腦嚟傾,咁又唔夠Free。呢款YESYSP-101總算解決咗問題,其接收範圍達室內50米或室外300米,即係話由門口出到走廊,再轉入後樓梯掟垃圾,全程可一路傾住!最緊要係同樣支援Skype,就算打畀外國朋友都唔使收IDD咁金,慳番好多㗎!
系統:WindowsXP或2000
硬碟:15MB或以上
網絡:ADSL或寬頻
通話時間:240分鐘
待機時間:120小時
接收範圍:50米(室內)/300米(室外)
功能:網絡/固網電話、免提、支援Skype軟件、5人會議通話、無線收發、USB2.0傳輸技術
售賣點:華仁會(68136813)
喺電腦上安裝舊式網絡電話,過程都幾繁複,例如裝軟件、駁線,然後做設定等,除非你玩開《MSN》或者《YahooMessenger》之類,否則要上手肯定會花些少時間。相反,YSP-101勝在容易安裝,其中跟機包1條USB2.0傳輸線及SkypeCD,你只要將USB拮落電腦,然後放光碟入CD-ROM,唔使10分鐘即完成所有設定;至於用法更類似屋企電話,唔使喺電腦Keyboard上㩒一輪掣就玩到,簡單程度甚至連阿爺級嘅電腦白癡都好快學曉。
無線電話裝分機唔算係新玩意,不過YSP-101將呢項功能強化過!佢能夠1拖5使用,意思係支援1部主機及4部分機咁解,唔只適用於地方大嘅環境,更好玩係,仲支援單系統多手提功能,即能夠將5個手機號碼分別Set入唔同電話,作為獨立使用,就算媽咪、老竇與囡囡同一時間傾緊電話,都唔怕撞線啦!軟件方面,Skype特別提供「多方通話」技術,玩法比固網嘅「3人會議」更簡單,只需喺介面上將朋友拖過「參與會議者」,即可同時間接通,勁快,最多5人一齊傾。
收費方面,主要分「Skpye」及「SkypeOut」兩種。前者完全免費,入會即用;後者屬於打手機及固網嗰種,要入會後再畀$100港幣,然後類似儲值卡咁逐分鐘扣錢,用完再增值信用點數。現時已有23個國家採用劃一收費,每分鐘$0.17,以$100計算,已夠你傾成10粒鐘IDD,勁抵玩!
網址:www.skype.com
究竟Skype除咗打IDD勁平、甚至唔使錢之餘,仲有乜好處?利用Skype嘅全球網絡系統,你其實仲可根據個人資料搜尋Skype友!過程相當簡單,即睇!
種類超多,根據地區、語言、性別及年齡等範圍,你可以搵出自己想認識嘅對象。
搵啱人後,只要獲得對方答允,並將你加入聯絡人名單,咁就可加入做Skype友。
打畀Skype友,只需Click幅相就自動駁;若對方非Skype用家,則要人手撥號。
撥號嗰陣,畫面上會出現接駁訊息,話你聽使用情況;傾完後仲提供詳細嘅通話記錄畀你參考。
「平時煲粥冇3粒鐘好難收手,今次終於可飛線落分機,獨立咁用,唔使同屋企爭啦!」
「每晚我會同外國朋友玩MSN,但原來網絡電話每分鐘只係收$0.17,平過IDD好多!」
「做完功課,可以打電話畀加拿大嘅婆婆,然後仲可以上網睇故事書㖭!」
「唔係好識用科技產品,後來發現,原來網絡電話就好似手機咁用法,唔算複雜。」
「可以當屋企電話咁用,同時又係1部網絡電話,2合1夠晒多花款喎!」