正喺倫敦舉行嘅溫布頓網球賽連日嚟都吸引到好多名人捧場，噚日舉行嘅一場賽事，就得到名模HeidiKlum、畢列谷巴（BradleyCooper）同祖迪羅（JudeLaw）各自帶埋另一半睇賽事。

現年43歲嘅HeidiKlum同只得29歲嘅藝術品經紀男友VitoSchnabel一向恩愛，呢一日佢哋喺觀眾席上又放閃，見到Vito肉緊捉實Heidi一啖咀落去，開初Heidi就一時未反應得嚟，咀到有啲面容扭曲。

另一對情侶畢列谷巴同索模艾琳娜（IrinaShayk）同樣慣咗喺人前煙韌，艾琳娜睇到悶悶哋仲一啖咬落男友膊頭，搞到當日唔單止精彩比賽，觀眾席景象都一樣咁好睇。