正所謂家家有本難唸經，現年36歲、2007年落選港姐張韋怡（Gogo），在2014年與經營家族生意的有錢男友Michael Poon結婚並誕下兒子Ashton，婚後入住夫家位於九龍塘8,000呎獨立屋，過着無憂的生活。不過《蘋果》昨日收到讀者報料，Gogo的姑仔在社交平台出post，鬧爆阿嫂的貪錢惡行，更爆出原來他們未有註冊，其後Gogo被問到此事，她說：「我都要返去了解吓，呢啲嘢始終係家事，多謝關心。」再問是否有註冊？Gogo回覆指與丈夫是事實婚姻。

Gogo其後再接受《蘋果》訪問，解釋事件始末，並直言假如對方再有進一步行動，不排除以法律追究。事件由前日Gogo在FB分享了一篇德國哲學家尼采的文章開始，當時Gogo留言說：「有位老人家叫我如果有一天他的女兒向我們道歉，請我原諒她！當然那些都是十惡不赦的事！我三十多年人看到最醜惡的靈魂！『原諒』絕對不會，對於這種低劣骯髒的，直接跨過ignore，零接觸零感覺零想法！」Gogo坦言自己不能做到「險毒和無聊」所以不會報復，但亦絕對不會當事情沒有發生，以及絕不會原諒對方：「不能放下的人，都係失敗輸家，做人不能麻木地善良，特別係面對陰暗險惡的人！既然彼此軌跡磁場不同，何必糾纏！」結果到了晚上，Gogo便被姑仔出post數臭，Gogo說：「我叫老公打畀佢了解，佢話我係先撩者賤，FB講哲學問題，我只係覺得對佢冇感覺，就算有乜都唔理，佢要覺得係講佢自己，咁冇辦法，我都希望佢覺醒，搞到成家人咁嘅關係。」

姑仔曾指摘Gogo用阿仔的名義，扮可憐叫爺爺畀100萬現金做教育基金，Gogo說：「係有一日，我老爺當住佢面前，話要畀100萬我個仔做基金，係佢自願畀，之後我將呢筆錢全數畀咗我老公再入落銀行，而我自己去北京讀書，呢個我係有單據，全部係我自己嘅積儲，本來60萬係我媽咪借錢畀我，不過我已經全數還晒畀媽咪。」她又指自己在無綫捱了10年，因希望為自己將來作打算，故轉行做生意：「我覺得自己有啲做生意嘅觸覺，所以咪試吓喺呢方面發展，於是我咪去讀書，填補吓自己不足，我發誓，如果唔係我個仔乜嘢意外都有！真係好委屈，因為家庭嘅事，我已經屈咗大半年，始終我哋係受害者。」

Gogo又指最初姑嫂關係尚算不錯，直到他們應老爺的要求搬回大宅一齊住，問題便由此事起：「始終潮州係重男輕女，可能佢喺某一啲嘢分配上有不滿，我哋都讓步，盡量滿足佢，所以佢應該非常知足。之後因為老爺唔舒服，希望可以多啲時間見吓個孫，所以我哋咪搬返去住，點知佢唔想我哋搬返屋企，咪搵所謂炒咗嘅工人做刀手，做咗好多好恐怖嘅嘢。」Gogo指解僱工人，完全是因為要保護家人：「係我老公炒嘅，菲傭嘅僱主係潘小姐，不過係我老公畀錢請，呢個工人做咗好多好恐怖嘅嘢，好似對小朋友吐口水，真係令我哋好震驚，雖然呢個工人冇對我個仔做過啲乜嘢，但我哋都好小心，惟有自己睇緊啲，亦都叫我嘅工人要小心，盡量親力親為，不過佢係一個好計較嘅人，我哋（啲物品）全部要分開，如果小朋友掂咗佢雪櫃啲嘢，都可以嘈一大餐，真係好辛苦，我始終係外人，唔係姓潘，有啲嘢忍得就忍。」

不過對Gogo而言，最難忍的是洩露了她的私隱：「我同老公，甚至二伯，係冇嘢對唔住潘家，我哋行得正企得正，如果佢再抹黑我，我會保留法律追究權利，因為佢嚴重誹謗、冤枉咗我，洩露咗我婚姻上嘅私隱。」Gogo坦承與丈夫在日本結婚，故兩人的婚姻在香港沒有法律效力：「我老公自己有個人經歷，可能係家庭背景問題，對婚姻有恐懼，如果我係咁貪錢，我唔會同佢生仔，不如分開喇，點解仲要一齊？我自己每一日都好多嘢做，根本冇精力、時間同大小姐鬥智鬥力，佢最終目的係想做啲乜嘢，其實我哋一家人都好清楚，我哋都有方法去處理，無論佢係用乜嘢方法，都改變唔到任何嘢，但係佢而家搞我，雖然我唔係一個好紅嘅藝人，但係都有朋友，佢咁樣滋擾，如果將來影響咗我啲生意，我真係會保留追究權利，佢咁大個人，我都希望佢為咗件事要負番啲責任。」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新