鄭伊健、陳小春、謝天華、林曉峰演出，錢嘉樂首次自導、自演嘅電影《黃金兄弟》今日上映，截至今日3點即時票房累計42萬，成績算係有交代。

今次鄭伊健放棄做古惑仔，改玩要做「有今生，有來世」嘅兄弟。呢幫兄弟噚日就去到長沙出席記者會，原本司儀安排佢上台講劇情。不過伊健就用佢唔鹹唔淡普通話話套戲講情講太多，不如入場自己睇，佢提議不如唱歌代替講嘢。好在佢哋嘅助手隨身帶有《友情歲月》嘅MMO，即場加插唱歌環節。相信現場唔少觀眾都係睇《古惑仔》系列電影長大，音樂一響起台下已經起哄。當鄭伊健唱出第一句「消失的光陰散在風裏」，台下已經跟住大合唱，而放映會400幾個座位亦座無虛席。

陳小春講到近日幫《黃》片宣傳嘅行程，佢話係前所未有咁辛苦：「真係好攰，但好開心，係唔知點解咁開心，覺得都係值得嘅。」鄭伊健話呢個回憶太美好，幾攰都係值得，佢話：「5兄弟留咗最好嘅回憶係呢套戲度。」

精選娛聞，喺晒《娛果》
http://fb.com/appledailyent