今年嘅政壇，真係畀青年新政嘅游蕙禎獨領風騷，由當選到被DQ，一直都係網民熱話，估唔到佢升呢做議員後講嘢都好坦白，有次出席論壇時語出驚人，講開土地不足時就舉例話：「就算我哋要扑嘢，都搵唔到房去扑」，旋即令無房扑嘢成為一時佳話，最終成為今年雅虎香港十大熱搜神級理論第一位，而男性網民對「扑嘢論」嘅搜尋量高達七成，比女性網民高2.5倍，估唔到真係咁多人關心「住屋」問題喎...

而被中央DQ咗嘅特首梁振英，今年都惹起唔少熱話，年初仲建議喺中環設立泳棚，建議上班族午飯後游水20分鐘，此說即刻惹嚟大批網民鬧佢離地，皆因食飯都未必夠時間，仲邊度有時間去游水呢？結果689嘅「午飯游水論」排喺神級理論第二位，而搜尋者中又以80及90後網民最關注！

翠如BB發表過嘅好驚人講粗口言論排第三，力壓屯門媽媽喺無綫節目中話要「贏在射精前」，計好嬰兒出生日期嘅言論。喺立法會「超級區議會」選舉狂吸49萬票成為票王嘅白鴿黨立法會議員鄺俊宇，帶出「逗號很累，但逗號不說」嘅鄺體，唔少網民搜尋佢嘅逗號論，唔通想做翻版鄺，文豪？

排喺逗號論之後嘅就係吳亮星就李波事件發表嘅「洗頭艇論」，相信大家至今記憶猶新。忽然選特首嘅退休法官胡國興憑住一句「佔中好玩論」排第七，力壓十大傑青黃仰芳嘅「買樓論」、前立法會議員何秀蘭回應游bb嘅「長髮論」以及梁唐青儀嘅「種菜論」。唔知明年今日嘅新特首，會唔會語出驚人有偉論上榜？

表：2016年度十大熱門搜尋神級理論

1／游蕙禎：「扑嘢論」

2／梁振英：「午飯游水論」

3／黃翠如：「粗口論」

4／屯門媽媽Irene：「贏在射精前」論

5／鄺俊宇：「逗號論」

6／吳亮星：「洗頭艇論」

7／胡國興：「佔中好玩論」

8／黃仰芳：「買樓論」

9／何秀蘭：「長髮論」

10／梁唐青儀：「種菜論」

資料來源：雅虎香港