滙豐一姐更上一層樓,成為恒生首位女大班,兼係恒指成份股首位女CEO,梁太話呢個係好大榮譽,當初上頭向佢徵詢時,佢覺得係一個好好嘅發展機會,開心又興奮。78年加入滙豐、由實習生做起嘅梁太,喺滙豐30幾年做過好多部門,連去澳洲做開荒牛都試過,今次佢話只係另一次調動,恒生有唔少滙豐舊同事,所以唔覺得離開滙豐。
梁太老實話新任務挑戰好大,金融業今年經營艱難,又要同中港監管機構打交道,呢方面佢經驗唔多,要好好學習。至於家人有同佢食飯慶祝,4月初仲會放大假一齊去澳洲玩。雖然5月6號至履新,但佢會4月尾到恒生返工做準備,首要工作係跟同事磨合,跟住研究架構有冇改善地方。
至於同梁太喺滙豐並肩多年嘅柯大俠就唔肯評價梁太,話唔想令佢壓力太大,但有一件憾事──上年定下目標,5年內令恒生嘅商業銀行業務盈利貢獻倍升到20%,希望梁太幫佢達成喎。