呢兩日氣溫突然轉冷,又收到上市公司要員去世嘅通告,喺地產界多年但低調嘅永發置業(287)伍氏家族,噚日宣佈佢哋嘅非執行董事及審核委員會成員伍大強,亦即伍氏家族嘅第二代,喺26號逝世。
根據永發年報資料,伍大強係公司主席伍時華嘅公子,啱啱過咗50歲,早喺85年已經加入家族生意幫手,佢主要負責資金管理嘅工作。佢仲有個細佬,叫伍大偉,遲佢兩年入公司,家吓係執行董事,主要負責行政同財務管理。佢兩兄弟一個管行政及財務,一個管資金,大家分工幫老爸,伍時華已70多歲,但仍掌管永發嘅主席一職,今次白頭人送黑頭人,華華希望佢節哀順變。