實施咗近一個月嘅《禁止蒙面規例》，到底有乜用？相信連提出嘅林鄭都唔知，但肯定更惹怒唔少市民，根本係製造白色恐怖，好似日前嘅萬聖節當日咁吖，市民連化過靚粧落街過節都提心吊膽，試問呢個香港點會仲係以前好自由嘅香港？雖然特首林鄭月娥拒聽民意，但呢條以「先訂立後審議」形式推行嘅惡法，喺民主派爭取下都有得舉行公聽會，但由於名額有限，慎防建制派又壟斷，民主派呼籲大家聽日﹙4日﹚朝早齊齊做鍵盤戰士，不停狂按F5掣登記報名，一旦成功登記，唔知畀唔畀蒙面出席聽證會？

建制派早前喺立法會《禁止蒙面規例》小組委員會，分別派出以開會時瞓覺出名嘅民建聯黃定光，以及準備生第二胎、腹大便便嘅新民黨容海恩，成功搶佔該委員會正、副主席職位後，民主派一直要求開聽證會畀市民發表意見。最終小組決定喺喺本周六﹙9日﹚舉行公聽會，但當日只限150個名額，仲要係先到先得。

唔少民主派有見及此，各自呼籲市民記住踴躍報名表態，好似新同盟范國威咁，佢今日﹙3日﹚特別喺IG出post，呼籲大家聽日﹙4日﹚上午9點去到立會呢個連結： https://app3.legco.gov.hk/ors/chinese/Invite.aspx ，準時喺電腦按F5掣，要搶喺最早嘅時間登記報名，以免公聽會變成建制派團體等人「一言堂」。

公民黨譚文豪都叫大家要搶攻，唔好畀建制派派員攞晒嘅發言機會，以免製造好多人支持《禁蒙面法》假象，特別呼籲和理非一族上場保護香港人，希望反映真實意見後，更多國際傳媒報道香港真相！

范國威已循西貢區議會運亨選區爭取連任，同區候選人尚有戴卓然、楊聰及劉志成。
-----------------------------
2019區選專頁
光復香港 11.24踢走共產黨
-----------------------------
【撐學生】
召集有心人 撐學生全年睇《蘋果》
立即按此
-----------------------------
百日特刊記載香港人逆權之路
《逆權百日》
《自由之夏》中文版
《自由之夏 Summer for Freedom》中英對照版