鄧達智與醫生男友陳梓欣（Clement）嘅婚宴，筵開16圍，請咗好友盧覓雪擔任司儀，兩人喺訪問前先喺台上咀嘴同拖手影相，之後接受傳媒訪問，鄧達智話：「一世人都冇戒指，冇手錶等等飾物，依家接受命運安排，戴上呢隻訂婚戒指。」之後兩人手指尾勾手指尾，一齊展示訂婚戒指。

講到呢隻訂婚戒指，鄧達智話：「隻戒指係Clement揀，佢鍾意呢個design，亦鍾意戒指上嘅豹頭，好man好男人。」佢又話結婚戒指就會以簡潔為主，方便Clement做手術時除下。

鄧達智笑言：「未習慣戴戒指，有時除低咗會唔記得戴，但件事係開心嘅。」而結婚戒指一陣喺婚宴就會交換。

之前講過婚宴係AA制，今日鄧達智就解釋：「本來係，但後來唔想，好多賓客都有送禮，好似鄭文雅就親自畫畫。」至於其他人諗唔到送乜，就可以封番利是就OK。

今日設宴，噚晚有冇失眠呢？鄧達智話：「我就會，Clement唔會。」仲讚Clement幫佢敷咗個Mask。

Clement就解釋：「係呀，盧覓雪話佢個樣好殘，幫佢做個mask。」呢次婚禮兩人籌備咗個幾月，佢話請人嚟有一定困難，一定要熟又要enjoy，好彩朋友都開明，超過80%以上都係「直」，會帶埋太太嚟，唔會擔心。