已宣布「出櫃」嘅同志歌手何韻詩,早前單人匹馬去咗北歐流浪一個月,為慳錢捨酒店住民宿,點知喺芬蘭遇到咸濕屋主,上月31日阿詩喺facebook自爆:「芬蘭恐怖住宿驚魂夜,嚇到我呢,好在我事發時夠鎮定,安全逃脫,最終個人無穿無爛。遲啲返來講俾大家聽,而家快快安頓補眠先。」
之後隔咗3日,阿詩再喺fb透露:「但到芬蘭rovaniemi竟然上演入住恐怖公寓,遇上鹹濕屋主要上演午夜冰海逃亡。」嚇到粉絲紛紛留言提醒:「雖然你好靚仔,但你真身始終都係個索女,請不要過份相信人性的美好面,獨自去些人少又陌生的地方,這樣會很令人擔心的!」阿詩抵死回覆:「無錯,經歷咗呢次恐怖公寓後,我終於接受我真係一個靚女呢個事實。」
仲有網友叫阿詩安全返嚟大家就放心,千祈唔好用咗自己方式唔知去咗邊,阿詩就答:「呢勻真係用自己方式冰上逃亡。」網友又問咸濕屋主有幾咸濕?阿詩話:「好很恐怖的。」
究竟阿詩喺芬蘭有冇畀咸濕屋主侵犯?有雜誌就爆男屋主喺半夜闖入房,成身酒味向阿詩霸王硬上弓,阿詩反抗時被扯爛衫露bra,佢搏命推屋主出房後,阿詩驚到即刻執嘢擒窗速逃,上演一場半裸逃亡記云云。
對於報道言之鑿鑿,阿詩回覆《蘋果》:「因為呢啲係虛構情節,所以唔回應,冇施暴冇半裸逃亡,好機智逃離間屋,雜誌求其搵一張相話係鹹濕佬,有啲嘢太誇張,好多都係假,唔係事實唔回應。」遇到咸濕屋主係真,午夜冰海逃亡係真,但過程發生乜事?阿詩話「遲啲至講」喎!