【負負得正？】未開齋騎練「拍檔」 忽然望見「晴朗」的一天！
蘋果日報 2019/10/12 11:00
開齋霍利時沙田日賽晴朗拍檔希威森
晴朗拍檔（近）曾在五班1400米上名
霍利時同希威森呢對南非籍騎練同為天涯淪落人，大家今季都未取得頭馬零的突破。今期（12日）沙田日賽練者出五駒，有四駒交予希威森操刀。
當中，頭場五班1600米「晴朗拍檔」有可能就係騎練開齋馬。
「晴朗拍檔」上仗由杜美爾出戰田草1400米，爆入一席大冷腳，賽後即由希威森接手，前後跳足六課，重視程度同誠意值滿分。
「晴朗拍檔」進步嘅關鍵係脾氣有改善，隻馬喺蘇偉賢馬房服役時，脾氣出名臭，試過喺沙圈內大發老脾，自然冇表現，經常跑雙位數名次。
不過，「晴朗拍檔」上季中轉入霍廐後，情緒大有改善，出賽前行圈已較以前淡定，曾經一連兩仗跑獲第六名，其中一仗只輸畀現居第三班嘅「天生一對」2.75馬位。
好景不常，此駒喺3月尾流鼻血，進度受到挫折，幸好上場季內初出，竟然有走勢兼能夠初次上名，養回健康之餘，亦感到呢匹六歲馬終於成大器，相信馬房花咗好多心機教馬。
「晴朗拍檔」如果初次跑1600米即贏，對馬主丶騎練嚟講，真係夠晒晴朗、一天都光晒！