憑台劇《命中注定我愛你》為人熟悉嘅台灣女星陳喬恩，今年初喺台北酒後駕駛被捕，其後陳喬恩喺微博發文道歉，並解釋事件起因係「在家中泡澡喝了酒，之後駕車去家附近買宵夜吃」，遇着警察路檢斷正（新聞連結： https://bit.ly/2QuQyXL ），而佢亦道歉認錯，話自己絕對唔會再犯交通規則。

事情經過近一年，將發展方向着重喺大陸嘅陳喬恩，早前上噚晚播出嘅大陸節目《吐槽大會》，陳喬恩被嘉賓輪流數瘀事，包括愛飲酒，又指佢同合作男星屢傳緋聞，但至今仲係單身，同場仲有朱孝天及侯佩岑等嘉賓。

其中嘉賓之一李誕話陳喬恩喺霍建華娶林心如當日買醉，陳喬恩喺節目中即回應：「屁，那是捏造的。」李誕之後嘲陳喬恩買醉唔使理由，「你說喝酒就喝酒，甚麼叫深夜買醉，我們陳喬恩中午就不買醉了嗎？」引得全場大笑，不過李誕都好識做，笑完隨即向陳喬恩道歉，陳喬恩亦笑住同對方握手，表示唔介意。

點知輪到《步步驚心》「十三爺」袁弘則爆料指陳喬恩容易餓，佢話：「一餓就容易吃宵夜，一吃宵夜就開車。」雖然袁弘冇明言提到飲酒，但大家都知佢暗示陳喬恩酒駕去買宵夜一事，袁弘仲要話：「喬恩，這麼近的距離，你不能走路去嗎？」

到陳喬恩「吐槽」時，佢自己主動提到「喝酒，千萬不要開車，不對的。」成功引得在場觀眾大笑，化解尷尬。

而陳喬恩亦有講到自己啲緋聞，現年39歲嘅佢話自己演偶像劇咁多年，年紀有時都做得男主角個阿媽，有次佢聽到自己與「小鮮肉」傳緋聞，當佢驚訝到O晒嘴時，竟然收到朋友打電話嚟話佢「妳好棒哦！」搞到陳喬恩忍唔住反白眼，仲要再三澄清緋聞係流料。陳喬恩話唔少網友叫佢早日搵個人珍惜佢、愛護佢，將佢捧喺手心，但陳喬恩喺噚日個節目中話：「我為甚麼要被別人捧在手心？我自己有手，而且我捧紅了我自己！」

精選娛聞，喺晒《娛果》
http://fb.com/appledailyent