話說某平日夜晚，距離Last Order大概15分鐘，餐廳只淨下一枱4人亦已經食完甜品。當大家都以為今日可以完美收工，點知門口殺出一個程咬金。程咬金做出一個震驚一百萬餐飲界同行嘅舉動，就係喺Last Order時間前將餐廳大門打開。

門口企咗一位衣著特別，揹住鮮綠色背囊、身穿淡啡色風褸嘅地中海中國籍大叔。

佢豎起一隻手指帶點口音講：「Table for one, please.」Open kitchen師傅立即面色一沉，要收尾嘅我心裡都流下一滴淚。門口同事只係淡淡地remind先生我哋個Last order時間。大叔講咗句No problem之後，我同事就帶佢坐低，亦都為我哋漫長嘅加拿大狂loop之夜掀開了序幕。

大叔被安排坐喺一張2人枱，有半邊梳化，都算係靚枱。不過正正就背住另一枱4位。無幾耐，佢又嫌人嘈，所以用英文同同事要求調入「房」。其實大家都知真係臨收工都唔會畀客入房，因為客人會唔知出面情況或者太私隱之下會唔捨得走，所以我哋Last order前半個鐘都唔會再畀人入房。我就走去同大叔解釋話房有同事休息緊（即係有啲同事等其他同事收工……），所以唔方便畀佢入房。

大叔突然轉Channel講廣東話：「I understand！查實我係加拿大人嚟嘅。我喺加拿大都慣咗，而我份人好casual㗎！嗱！最多你畀我快快脆入房食，我咪快快脆走囉。」

查實我唔知關佢係加拿大人咩事，亦唔知佢明唔明咩叫understand，更加唔知佢所講嘅慣咗係乜？如果係慣咗爛人尾，咁你都幾不該喎大叔。我都唔想耽誤太耐，因為阿叔連單都未落！！所以我就急急腳安排咗個房Corner位畀佢。見佢睇咗餐牌一陣，我就行埋去啦。

我：「先生，請問ready order未呢 ？」

加拿大叔：「（一面歡喜）小妹妹，你公司有咩特色菜呢！我係加拿大人嚟（又重複），之前住過香港嘅，有咩special介紹畀我呢個加拿大人呢？」

介紹個last order時間畀你吖！你仲有60秒落單。

我：「先生可以試吓我哋個招牌菜，西班牙海鮮炒飯同埋個XXXX烤乳豬呀！」
加拿大叔：「呀吓（自high好開心）～你以為我外國人就大食啲咩！成十點幾啦傻妹！一個人點食得晒成個飯呀。我係個好健康嘅加拿大人嚟㗎。」

……乜你都知夜㗎？

我：「咁先生你可以選擇我哋啲special salad，有XXX，XXX。」
加拿大叔：「Er，雖則我好健康，不過今晚我唔想食太多菜喎。我喺加拿大食開啲salad一定仲靚過你香港啲菜啦。」

__，咁你不如返加拿大啦。

我：「先生，如果唔想太heavy，不如你睇吓頭兩頁嘅tapas啦。」

加拿大叔：「oh great！Tapas西班牙小食！I like it. 我喺加拿大都有食過西班牙tapas㗎！不過因為我加拿大返嚟，仲未習慣睇返中文字，畀少少時間我睇吓。」

Er⋯⋯我個餐牌有英文㗎喎，阿叔你係咪嚟搞笑！？見佢咁專心，我就唯有喺旁邊後備啦。Open Kitchen同大廚房嘅師傅都衝晒出嚟等我張單，但我只能用哀怨眼神交代條友仲未得呀！查實聽佢loop加拿大三隻字都無咗60秒，如果佢講少啲呢三個字，師傅都煮完畀佢仲食得添呀。

（待續⋯⋯）


專欄作者簡介：
The Beggar in the Restaurant 店小二Mary
我係一位從來唔對客人黑面，經常笑面迎人嘅侍應，著有《乞客MENU》。

Facebook專頁：The Beggar in the Restaurant乞客
https://www.facebook.com/BeggarintheRestaurant


發掘更多身邊的小城故事，請LIKE 蘋地 Facebook Page，並設定為「搶先看」： https://fb.com/appledailyland