陳柏宇(Jason)一連三場演唱會噚晚喺九展完滿結束，Jason喺台上話覺得唔夠喉：「我覺得下次可以開多2場，有好多歌仲想唱！」之後佢又搵咗3對情侶玩遊戲，其中一對仲係男男！跟住Jason亦都有落台派禮物畀同fans，但係有唔少fans禮物送畀佢，Jason話：「可惜o依家唔係農曆新年！」

完騷後Jason接受訪問，佢話：「我自己都有啲唔捨得，不過今日好攰，我覺得可以唱多兩場，可以應付到。」太太符曉薇同女兒Abigail喺台下睇騷，Jason就話：「冇緊張，反而出場嗰陣興奮啲，不過唱唱吓都唔記得佢哋，因為要有專業嘅表現，唔可以成日掛住。」

講到太太符曉薇日前喺ig話囡囡唔肯飲奶搞到瘦晒，Jason話：「都唔係瘦晒，噚日磅完有增長，o依家重10點幾磅。」唔知完騷之後會唔會 多啲時間湊女？Jason話：「理論上就係，我請咗兩日假休息吓，因為太近頒獎禮，所以都唔會休息太多。」

精選娛聞，喺晒《娛果》
http://fb.com/appledailyent