係。

仍然係MandyLieu同洗米華。

有追開，應該會繼續追套連續劇。冇追開嘅，食lunch嗰陣無聊咪望兩眼囉。

原以為故事隨著洗米嫂Heidi(陳慧玲)要求離婚而告一段落——係囉，都搞到離婚喇，冇嘢好爭喇嘛？新發展係洗米華唔想頭家散唔想離婚，仲送上物業俾洗米嫂(知情人士講0架咋)希望令佢回心轉意，但與此同時Mandy五月又返港同洗米生一家三口團聚喇，又話喺港島物色獨立屋喇……最爆嘅仲係，Mandy被指已經懷孕四個月。

所以，今日再有周刊影到洗米華同Mandy喺泰國beach點樣又攬又啜又摸又盛，已經不再震撼……好似係，除非唔係。

報道指，洗米華同MandyLieu，仲有囡囡周願，一家三口農曆年之前去咗轉布吉，之後洗米華離隊、會合大仔柏豪去咗轉東京，之後又走番去泰國join番Mandy，繼續喺曼谷、芭堤雅享受生活兼共度情人節。其中一日兩個大人仲擺低個B，過其二人世界。身穿低胸花裙熱褲嘅Mandy大露背狂曬，惹火熱情，兩人興起亦自自然然脷疊脷。報道仲話洗米華攬實Mandy咀嗰陣，仲情不自禁一嘢「揸」落去———Mandy條裙。

真係好激情嘅啫！