韓劇《奇皇后》39歲女星河智苑（本名田海林）嘅演員胞弟田汰遂今年1月離世，享年33歲。根據報道指田汰遂一直患有抑鬱症，亦一直有接受治療，低有關方面就未有透露田汰遂嘅死因。

由於胞弟突然離世，河智苑方面已即時取消所有工作，包括為新片《追捕》嘅宣傳活動，上月其事務所就透露河智苑將於下周六喺韓國舉行粉絲簽名會，喺胞弟離世後喺韓國嘅首個工作。

不過原來河智苑日前已低調復工，當中分別喺上周六及今日喺日本大阪及東京舉行粉絲見面會，大阪見面會已順利完成，河智苑噚日同今日亦喺Instagram上載照片，喺佢自胞弟出事後首次上載自己嘅近照，只見佢比之前瘦咗少少，幸好佢胃口似乎唔錯，仲有食粉絲送畀佢嘅零食。當中噚日佢就留言：「第一次大阪粉絲見面會，好幸福。」又指下次再見粉絲。今日河智苑就繼續晒新相答謝粉絲嘅禮埋，又大讚零食好好食。

更多韓流，喺晒《娛果》
http://fb.com/appledailyent