「綠蔭裏，草坡上，又見CY呢個名……在燦爛陽光裏面，看CY萬萬遍，山光水色美而秀，願CY莫污染。」譚校長喺八十年代為漁農處（漁護署前身）主唱嘅郊野公園主題曲《我愛大自然》，只要改幾句歌詞，到咗2014年都一樣咁應景。

特首梁振英一直對佔用全港四成土地嘅郊野公園睇唔順眼，上任前，佢曾經撰文質疑郊野公園嘅價值，認為大部份基層市民冇時間享用郊野公園，反而居住空間就好擠逼。上任後，佢嘅忠實追隨者陳茂波、林奮強、劉炳章都先後發功，提出將郊野公園部份土地拎出嚟發展嘅可行性。

遍佈港九新界

點解CY同一眾梁粉係要同郊野公園作對？答案已經刻咗喺郊野公園裏面。八方收到好幾位行山常客報料，發現全港多個郊野公園，包括港島龍脊、九龍獅子山、新界針山草山等等，都出現不滿CY嘅塗鴉；樹上、地下，都滿佈「CY無恥無信」、「CY人治獨裁」呢啲字句。你話CY去到郊野公園見到，有乜嘢辦法唔眼冤？
一路漫遊麥理浩徑、衛奕信徑，一路睇到針對CY嘅評語，感覺都幾無奈吓。不過八方喺度奉勸一句，大家幾憎CY都好，都唔應該搵啲樹木嚟發洩；郊野公園破壞越嚴重，只會更加益咗發展商。同埋呢，方丈份人好小器㗎！

mailto:[email protected]