當年今日
關於我們

【爆相爆片】太古城體感浮床又生意外 目擊者:小朋友嘴角受傷喊到拆天

蘋果日報 2018/07/16 00:01

嘴角受傷體感浮床屢生意外太古城中心爆相爆片

太古城中心中庭的迪士尼彼思「The Big Splash」親子遊戲「體感浮床」又發生意外!有讀者噚晚約7時半見到年約4歲男童喺浮床玩嘅時候,懷疑唔小心撞傷嘴流血,「喊到拆天」,媽媽忙在旁安慰及以紙巾為愛兒抹血,一時間輪候者議論紛紛,好彩小朋友傷勢不嚴重,最終毋須送院。話說回來,今次已經體感浮床不足一個月內第二次有小朋友受傷了,無獨有偶,上月同樣係4歲小朋友受傷,但上個月嗰位小朋友畀浮床圍板劏開眼角,情況比今次嚴重得多。
根據女讀者噚晚喺現場影到嘅相,見到受傷嘅小朋友剛巧坐喺體感浮床邊緣外嘅位置,母親以紙巾為他受傷嘴部止血,但現場地面未見有血迹。意外發生之後,浮床曾經好短暫停運作,等候工作人員檢查,證實無礙後重開。女讀者稱睇唔到意外點發生,但覺得其實現場安全已算是OK,最重要還是家長要小心看顧小朋友。
《蘋果》記者接報到場後已經搵唔到傷者,但見到依然有好多大人及朋友排隊入去玩浮床,陪小朋友排隊嘅仲包括咗孕婦。體感浮床外則貼出安全告示,列明每一節(8分鐘)只限20人玩耍避免過份擠逼,玩者必須脫鞋但要穿襪子,12歲以下小童則必須由家長或18歲以上監護人陪同,以策安全,現場受訪家長大都表示唔擔心安全問題。
太古城中心發言人則證實,噚晚7點半左右有一名約4歲的小童在體感浮床玩時嘴部擦傷,她指當時小童疑是跳出池外時意外受傷,但傷勢不嚴重,在場有人替小童包紥後,父母已把男撞接走,毋須送院。記者問會否覺得場地安全尚有可改善嘅地方?發言人就話其實自上個月嘅意外後,已經加厚咗護墊以及保護圍邊,相信今次只是意外。另外,體感浮床噚晚已經係最後一天開放了,該玩意料稍後會拆走。
你敢爆,我敢獎!即Call《蘋果》24小時爆相爆片熱線 :63836568