正如本地排球壇著名評述員雷sir有云：「食叉燒骾骨！」各路歐洲群雄喺世界盃外圍賽食魚腩一樣小心骾骨！周五歐洲區世盃外B組，世界排名186嘅安道爾乘2月友賽勇挫聖馬力諾之勢，上場世盃外主場已經守和法羅群島0:0，點知今場迎戰世界排名33兼去年歐國盃決賽周分子匈牙利，竟然憑馬克列比斯（Marc Rebes）26分鐘頭槌收死效力德甲二哥RB萊比錫嘅匈牙利門將古拿斯，主場小勝1:0，苦等4,622日後終於繼2004年10月世盃外擊敗馬其頓後再嘗大賽外圍賽勝利滋味，恭喜晒！

同日另一「魚腩」直布羅陀亦大打爭氣波，呢支去年9月首度出戰國際足協認可賽事嘅國家隊，喺世盃外歐洲區H組主場面對塞浦路斯幾乎搶得大賽外圍賽第一分，可惜力拼至87分鐘失守輸1:2，但表現絕對值得畀掌聲！