當年今日
關於我們

【韓流】朴信惠為新劇學西班牙語 坦言海外拍攝有難度

蘋果日報 2018/12/18 14:52

阿爾罕布拉宮的回憶朴信惠玄彬

韓國型男玄彬孖女星朴信惠主演嘅tvN劇集《阿爾罕布拉宮的回憶》現正喺韓國熱播,至於港劇迷就可以透過Netflix追劇。雖然朴信惠及玄彬正趕拍劇集,不過亦有抽空受訪,大談新劇。
《阿爾罕》加入遊戲元素AR(擴增實境)模式,令劇中飾演投資公司老闆嘅玄彬慢慢分唔清喺現實定喺虛擬世界,故事相當創新,朴信惠受訪時坦言對新題材感到擔心,不過因為《阿爾罕》係由韓劇《W-兩個世界》嘅宋在貞編劇執筆,朴信惠稱對編劇嘅作品感到好奇,加上佢好鍾意其飾演嘅鄭希周一角嘅溫暖性格,所以決定演出劇集。朴信惠亦表示:「劉鎮宇(玄彬飾演角色)被遊戲搞到非常困惑,我認為希周係一直喺鎮宇身邊幫助佢脫離困境嘅人。」
由於鄭希周係喺西班牙經營旅館,亦係一名結他手,所以朴信惠就喺劇集開拍前,特地去咗學西班牙語及苦練結他。對於西班牙,朴信惠亦表示好鍾意當地嘅風情,所以有機會會想再去一次西班牙。
至於朴信惠喺劇中有另一個身份,就係遊戲電腦角色Emma,朴信惠笑言:「為咗分別Emma及希周兩個角色,我透過化妝、服裝嘅細節令兩者有所不同。Emma可以換唔同華麗嘅衫及特殊彩妝,我覺得好好玩。」續指:「為咗更好地表現出遊戲電腦角色,我仲特地去打機,了解實際遊戲中角色嘅動作、聲音語調。」明顯下過苦功。
受訪時,朴信惠表示海外拍攝最困難嘅地方係環境嘈雜,不過相比起玄彬嘅多場動作場面,已經輕鬆好多。而近年唔少韓劇都揀喺海外取景,朴信惠笑指:「係好新潮嘅事,不過拍攝時間就變得相當有限。」被問到劇中最難忘嘅情節,朴信惠指:「喺照顧受傷嘅鎮宇時,兩人有微妙嘅情愫,因為兩人係喺當下先開始互有好感。」
今次係朴信惠及玄彬首度合作,受訪時朴信惠就大讚對方有禮貌、好好人:「剛開始拍攝時,我哋每逢周末都會有休息嘅時間,玄彬就會將大家聚埋一齊傾偈、對戲,所以大家好快熟絡。」

精選韓流,喺晒《娛果》
http://fb.com/appledailyent
empty
大讚拍檔玄彬
empty
朴信惠於劇中有另一角色