當年今日
關於我們

家有寵物:跟羅敏莊上堂
貓貓無痛沖涼

蘋果日報 2007/05/15 00:00


講起同貓沖涼,好多養貓的朋友都會好頭痕!因為貓貓好似先天性抗拒沖涼咁,落一次水,一定會俾佢哋搞到傷痕纍纍。家有五貓嘅「飛鳳公主」羅敏莊(MiMi)當然清楚呢種苦況啦,「次次同佢哋沖涼好似搏命咁,我同陳國邦都要合力捉住佢哋,仲要着晒泳衣入浴缸,因為會俾佢整到濕晒!」MiMi今日就跟住寵物店的專業美容師,同大家示範點樣可以無痛沖貓,去片!

記者:黃錫蓮
攝影:林栢鈞
場地提供和示範:寵物寶寶娛樂城(www.petspark.hk)
a.小Mi(7歲)
性別:雌性
貓種:蘇格蘭摺耳貓

b.小寶(8歲)
性別:雌性
貓種:波斯貓

c.細佬(1歲)
性別:雄性
貓種:家貓

d.妹妹(1歲)
性別:雌性
貓種:家貓

e.細貓(7歲)
性別:雄性
貓種:家貓
steps 沖涼先洗耳
empty
1.MiMi先由屋企出發到寵物店,佢二話不說將小寶生擒入袋,只見小寶不斷喵喵苦叫。
empty
2.美容師Rachel好熟手咁將小寶輕按在美容枱上,然後開始指導MiMi點樣同小寶沖涼,第一步:洗耳仔。
empty
3.第二步:剪腳毛同修腳甲,跟住就要開始同小寶沖涼啦!
empty
4.首先同小寶淋濕個身,跟住就用沖涼液清洗佢全身,同佢按摩一輪後過水;再塗護毛素,最後過水。
empty
5.用毛巾吸亁小寶身上的水珠後,MiMi出動風筒同佢吹亁全身的毛。
empty
6.跟住MiMi同小寶做香薰按摩,小寶俾佢按得好舒服,唔覺意仲瞓着埋。
empty
7.做完按摩,就到剪毛了,MiMi話,想幫小寶整番個SummerLook。
empty
8.大功告成!MiMi同陳國邦仲幫小寶戴上剛選購的靚帽仔,可惜小寶瞓得太香甜,睇唔到自己個型女Look。
沖涼小貼士
1.沖涼前要先檢查貓咪身上的毛毛有否打結,如果有的話要先解開,否則濕水後更難解。

2.替貓沖涼前,可先替牠戴上頸圈及貓繩,然後把貓繩綁在浴缸,因為這樣可以限制牠只得小量活動空間,即使牠發惡時,主人只要退後,就不會被抓傷。3.若貓咪抗拒洗澡,沖水時間可以耐一點,而且將水力較得慢點,讓牠可以慢慢適應,之後才為牠塗沖涼液。

4.貓沖完涼後替牠吹亁毛毛,但牠卻在發惡,這時可把貓放入籠,然後隔着籠吹亁牠的毛。

5.貓沖完涼後仍經常抓耳,但已徹底過水,有可能是耳朵發炎,要帶牠看獸醫。

6.如果發現貓的耳朵後出現紅點,而且紅點越來越大粒,有可能有傳染病,可嘗試每隔兩至三天替牠沖涼時,在水中加少許鹽。若情況沒有好轉,就要帶牠看獸醫。
empty
美容師推介
empty
■(左起)Wags&tails有機小麥草精華潔毛液、護毛素和香薰。各$128
empty
■(左起)DermaPet洗牙液、Essentials洗耳液和亮麗洗眼液。
鏡頭背後
整個拍攝過程都甚為艱難,因為小寶遺傳了爹哋媽咪的演藝細胞,對鏡頭甚為敏感,所以佢經常左閃右避。加上MiMi啲貓都甚怕洗白白,即使係作狀扮沖涼,佢哋都非常驚慌,仲驚到抓傷媽咪,有相為證:
empty
■影相之嘛,小寶在眾目睽睽之下竟然逃走,唉,無佢符!
家有五位小朋友
談起與愛貓之間的感情,MiMi說:「牠們已成了我生活中的重要部份,就像我的家人一樣,我會因為牠們生病而緊張和心痛,甚至會喊。」咁陳國邦會點做?「佢都會好緊張貓貓,但一邊又要安慰我,一邊又要自己保持冷靜。其實佢以前都無對貓咁瘋狂的,係受我影響才咁樣。」這時陳國邦亦說:「其實貓好似小朋友咁,並唔係外間認為這麼Cool,好多貓都會幾熱情。」
empty
■爹哋媽咪成日為貓寶寶挑選一些日常用品,做佢哋隻貓真幸福呢!
對小Mi特別憐愛
來到MiMi的家,她第一時間給我們介紹的是躺卧籃裏的小Mi,她說:「看,牠的後腳不能屈曲,行動不便,很慘。可能因為咁,小Mi性格好Cool,唔睬其他貓,所以成日收埋自己。」原來醫生告訴她,蘇格蘭摺耳貓的腳容易出現問題,MiMi帶點激動地說:「繁殖者很殘忍,要把貓混來混去,令到牠們受害!其實牠們很慘很無辜。」
empty
■睇見MiMi屋企的布置,就知道呢個係一個貓之家。
至於其他貓寶寶,MiMi更是如數家珍,「小寶係我第一隻養嘅貓,家中唯一的長毛貓,性格較靜;細貓性格最活潑,佢性格好似狗,成日都好黐身,無論我哋睇電視定係瞓覺,佢都會黐實我哋。」她續說:「細貓係我同國邦仲住喺西貢時收養的,佢本來有個家姐,兩姊妹跟蹤我哋返屋企,咁就收養咗佢哋。不過後來可能家姐唔習慣新環境,所以偷走咗。」MiMi不禁搖頭歎息,「另外兩隻貓,一隻叫細佬,一隻叫妹妹,係在收養中心領養的。我好鼓勵市民多啲收養貓,因為香港流浪貓的數目實在太多了!」
empty
盡量留在家陪貓
現時MiMi和陳國邦都有份參與無綫新劇《第三類暗戰》的演出,MiMi更要兼顧電台的工作,問到她可有時間與貓玩耍時,她說:「在不用開工的日子,我哋都會盡量留喺屋企陪伴佢哋,因為怕佢哋感到寂寞呢!」由此可見,他們對貓的感情有多深。問到點解佢同陳國邦咁鍾意養貓,MiMi爽快咁話:「因為我哋性格似貓!」即係點?「我哋都享受私人空間,唔鍾意煩人,亦唔鍾意俾人煩。」呢個會唔會都係其他貓癡嘅心聲呢?
empty
■MiMi和陳國邦的愛貓照,表現在生活每個細節上,感覺相當溫馨。
empty
empty
三星期基本寵物美容課程
每星期一堂,每堂2小時
學費:每位$1,200
課程:工具運用、基本操控、基本護理(眼、耳、腳甲)、日常清潔知識及實習

查詢:寵物寶寶娛樂城(22074665)