看蛋糕色彩繽紛的裝飾，難免令人懷疑真係食得落肚？原來3D模型蛋糕製作過程分兩個步驟，一是裝飾，二是蛋糕。裝飾為翻糖或黏土製作的空心外殼，方便寵物主人留作收藏紀念；而裏面的蛋糕，並非一般麵粉製蛋糕，而是以肉類及蔬菜製成，「其實狗仔腸胃唔係好消化到澱粉質同麩質，所以唔會用麵粉去做。」除了蛋糕外，店內還有Sherona從國外購入，再自行風乾或凍乾的食物，例如較受歡迎的羊奶芝士、三文魚等，甚至鹿肉、鴕鳥肉、鱷魚肉都有，「好多家長揀鹿肉或鴕鳥肉，相對其他材料都較低敏低脂。鱷魚肉對氣管好，有啲家長會買風乾小食，每日俾一塊肉，寵物氣管會有改善。」Sherona更指出，許多人誤會了天然無添加的食材就適合寵物，其實不然，「例如粟米，其實佢哋好難消化，會一粒粒屙番出嚟。同埋豆類，豆類好容易引起胃氣脹，會令佢哋肚仔唔舒服。仲有芝士，點解我哋會用羊奶做芝士？因為羊奶無乳糖，牛奶造的芝士有乳糖。好多狗仔有乳糖不耐症，其實佢哋唔係對奶敏感，而係對乳糖敏感。」

每逢過時過節，Sherona亦會設計不同款式的食品，讓寵物與主人一同慶祝。糭、月餅、平安包甚至嫁女餅，應有盡有，皆因她認為自己不只賣蛋糕咁簡單，「我哋初初開業時同人講，我哋係賣緊一個回憶，因為宜家啲人養寵物其實當佢哋屋企人、自己小朋友咁，你都希望同屋企人有好多唔同回憶，我哋就將呢樣嘢套入公司概念。」只是Sherona並不滿足於此，早已報讀澳洲獸醫進修學校開辦的遙距課程，計劃明年進修寵物護理，學習寵物營養學，「最重要嘅係，我地盡量想推出嘅產品都可以陪住啲客一齊成長。踏入第6年，我哋客人（寵物）開始老。舊年我哋就推出咗套餐俾老狗，低脂肪且質感無咁硬。所以產品一直都變，陪住佢哋成長。」

臨近聖誕，就讓Sherona教我們製作一款簡單的「雪人蒸蛋糕」，和寵物一起歡度佳節。

寵‧愛點 Petisserie
Facebook專頁：Petisserie.HK

記者：封愷瑜
攝影：鄧鴻欣