因為唔見咗兩部載有全港選民資料電腦而被鬧爆嘅選舉事務處以及政制及內地事務局，今日除咗出咗份調查報告，亦向立法會議員發送文件，就有意改變立法會選舉中地區直選中嘅選票設計，諮詢佢哋意見。

點解要改設計？政府話喎，地區直選候選人數目越來越多，再整大啲張選票，印刷、運送、連帶票箱嘅開支會增加，但唔整大張啲，啲字又會越縮越細等，所以有幾條好橋，包括唔再喺選票上印候選人啲相、或者cut晒政黨名同標誌，再唔係兩樣都cut晒，咁就大把位印啲候選人名字落去。

八方初步問過民主黨胡志偉、民建聯陳克勤同工聯會黃國健，三位不約而同唱反調，覺得無論係唔印候選人張相、或者唔印黨名黨徽，都會影響部份選民投票，尤其黃國健話呀，爭取冧莊嘅舊人可能好啲，因為有一定知名度，但對新人嚟講，冇咗相或黨徽，真係麻煩好多，政府似乎又要再度過！