「神之子」歐陽耀冲去咗葡甲都一段時間，早排佢就成功進入球賽球員名單，但未有機會落場。最近就冇乜歐冲新消息，一嚟就整單大嘢。

首先，呢件事係個好消息嚟嘅，因為有傳歐冲獲葡萄牙體育會續約，有機會繼續留喺葡甲。問題就出現喇！有位歐冲朋友喺佢Facebook到打咗段接近成千字嘅文，內容係講因為幫歐冲申請簽證，需要攞一份無犯罪紀錄，但係幾經辛苦搞咗幾個月，先等到中國大使館出到證明，再去警察總部交表。等咗幾個月，諗住終於可以搞得掂，鬆一口氣啦，點知警察話格式唔啱，要重做。歐冲朋友就話，香港要嘅資料全部都有齊，格式就係中國大使館畀嘅，但警察就話可能一國兩制所以唔啱用，球會嗰邊都未試過有球員搞個簽證都咁麻煩。

網民睇到呢單嘢，唔嬲就假啦！難得有香港球員肯出去捱，仲有機會續約，分分鐘因為啲無謂嘢而斷送。有網民話好憎呢啲官僚，仲話香港文化就最鍾意搵「格式」嚟玩人。

雖然成件事就好無奈，但從呢件事亦都睇到，仲有好多球迷關心同埋支持歐冲你㗎！所以無論點都好，希望歐冲繼續努力踢好波，唔好令大家失望呀！